Նիկոլ Փաշինյանն ընթերցել է աղմկահարույց «Իմ մարմինն անձնական է» գիրքը, գոհ է ՀԿ-ի աշխատանքից. ՏԵՍԱՆՅՈՒԹ

Վարչապետ դառնալու մեկ տարվա կապակցությամբ հրավիրված ասուլիսի ընթացքում Նիկոլ Փաշինյանն անդրադարձավ «Իմ մարմինն անձնական է» գրքի քննարկումը տապալելու դեպքին՝ նշելով, որ գրքի էլեկտրոնային տարբերակն արդեն հասցրել է ուսումնասիրել:

«2017 թվականին Հայաստանում մանկապղծության 71 դեպք է տեղի ունեցել։ Այդ դեպքերի մեծամասնությունը կատարվում է այն պատճառով, որ երեխաները շատ դեպքերում չեն հասկանում, թե իրենց հետ ինչ է տեղի ունենում։ Կարդացի և ուզում էի հասկանալ՝ որևէ սարսափելի բան կա՞, թե՞ ոչ։ Գրքի միջոցով երեխաներին ուզում են բացատրել, որ եթե որևէ օտար մարդ փորձում է դիպչել իրենց մարմնի անձնական մասերին, ապա դա նորմալ չէ: Նման դեպքերում երեխաները, շատ հաճախ, ինտուիտիվ զգացողություն են ունենում, սակայն չեն գիտակցում՝ դա նորմա՞լ է, թե՞ ոչ։ Եվ սա արվում է մի երկրում, որտեղ տարեկան մանկապղծության մոտ 70 դեպք է գրանցվում»,- ընդգծեց Փաշինյանը։

Վարչապետի կարծիքով՝ գրքում ոչ մի արտառոց բան չկա: «Չեմ կարծում, որ այդ աշխատանքը կատարվել է առանց մասնագետների միջամտության»:

Խոսելով Հայաստանում անչափահասների նկատմամբ սեռական բռնության դեպքերի  նվազման վերաբերյալ Ոստիկանության ներկայացրած տվյալների և «Իմ մարմինն անձնական է» գիրքը պատրաստած հասարակական կազմակերպության մասին՝ Փաշինյանն ընդգծեց. «Իսկ գուցե մանկապղծության թիվը տարեցտարի նվազում է հենց նմանատիպ հասարակական կազմակերպությունների գործունեության արդյունքում»։

Նրա խոսքով՝ այս խնդիրը Հայաստանում նոր չէ և երեխաներին պետք է սեռական գրագիտությամբ ապահովել:

Մանրամասները՝ տեսանյութում:

Ռոբերտ Անանյան