Քաղաքականություն
31.08.2017 | 13:52«Նաիրիտ» քիմիական գործարանի աշխատակիցներն այսօր անժամկետ նստացույց են սկսել Կառավարության դիմաց: Կառավարության հերթական նիստին զուգահեռ գործադիրի շենքի մոտ հավաքված նաիրիտցները պահանջում էին իրենց տեղեկատվություն տրամադրել գործարանի վերագործարկման նպատակով «Եվրոպա-Ասիա բիզնես ֆինանսական կենտրոն» հոլդինգի և Կառավարության ներկայացուցիչների միջև ընթացող բանակցություններից:
Նշենք, որ վերջերս հայտնի դարձավ, որ «Եվրոպա-Ասիա բիզնես ֆինանսական կենտրոն» հոլդինգը բանակցում է կառավարության հետ «Նաիրիտ» գործարանի վերագործարկման շուրջ: Ընկերությունը 100 միլիոն դոլարի չափով ներդրում կատարելու պատրաստակամություն է հայտնել, բացի այդ, հանդիպում են ունեցել Կառավարության ներկայացուցիչների հետ:
Նաիրիտցիների ցույցերը համակարգող խմբի անդամ Կարինե Շահվերդյանը մեզ հետ զրույցում ասաց, որ ներդրողները նախևառաջ ցանկություն են հայտնել հուշագիր ստորագրել, ապա գործարանում տեխնիկական աուդիտ անցկացնել:
«Գործարանից օտարվել են շատ կարևոր սարքավորումներ, որոնք վերագործարկման համար անհրաժեշտ կլինեն, դրա համար էլ հոլդինգն ուզում է աուդիտ անցկացնել, որպեսզի հասկանա հավելյալ ինչքան գումար է անհրաժեշտ վերագործարկման համար»,- նշեց Կարինե Շահվերդյանը՝ հավելելով, որ աուդիտ եթե անցկացվի, հնարավոր է պարզվի, թե սնանկության կառավարիչն ինչ թալան է կատարել:
Եվ մինչ նաիրիտցիները պնդում են, որ «Եվրոպա-Ասիա բիզնես ֆինանսական կենտրոն» հոլդինգը պատրաստ է անհրաժեշտ ներդրումները կատարել քիմիական գործարանի վերագործարկման համար, Կառավարությունից հակադարձում են, որ իրատեսական չէ 4596 եվրո սեփական կապիտալ ունեցող ընկերության հետ մի քանի տասնյակ միլիոն ԱՄՆ դոլար պահանջող ներդրումային ծրագրի քննարկումը:
««Նաիրիտ» գործարանի վերագործարկման նպատակով «Եվրոպա-Ասիա բիզնես ֆինանսական կենտրոն» հոլդինգի հետ քննարկումների իրականացնումն իրատեսական չէ, քանի որ դրա համար անհրաժեշտ են մի քանի տասնյակ միլիոն ԱՄՆ դոլարի հասնող ներդրումներ, մինչդեռ հոլդինգի սեփական կապիտալը հասնում է ընդամենը մի քանի հազար ԱՄՆ դոլարի»,- այսօր ասել է ՀՀ կառավարության աշխատակազմի ղեկավարի տեղակալ Վահե Ջիլավյանը:
Մանրամասները՝ տեսանյութում:
Շողիկ Գալստյան
