Հանրային ռադիոյի որոշ հաստիքներ եւ տնօրենի աշխատավարձը կրճատվելու են

Շիրակի նախկին հանրային հեռուստառադիոընկերության սարքավորումները տրվելու են Հանրային հեռուստառադիոընկերության խորհրդին: Հանրային ռադիոյի տնօրեն Գարեգին Խումարյանը հույս ունի, որ այն կտրվի իրենց: Այս մասին Factor.am-ի հետ զրույցում ասաց պարոն Խումարյանը:

Հնարավոր է, որ «Շիրակ» ռադիոյի 120.5 հաճախականությունը ևս տրվի Հանրային ռադիոյին, քանի որ հանրայինի հեռարձակումը Շիրակի մարզի որոշ գյուղական համայնքներում թույլ է: Տեղեկությունների վերաբերյալ Գարեգին Խումարյանը նշեց, որ կապուղու հետ կապված դեռ որևէ փաստաթուղթ չեն ստացել, բայց տեսական քննարկում կա:

Հիշեցնենք, որ Հանրային ռադիոյի տնօրենի փոփոխության հարցն օրակարգում էր հայտնվել, քանի որ աշխատակիցները դժգոհում էին նախկին տնօրեն Մարկ Գրիգորյանի բարձր աշխատավարձից: Աշխատակիցները մասնավոր զրույցներում նշում էին, որ Մարկ Գրիգորյանը մինչև երեք մլն դրամ աշխատավարձ էր ստանաում: Խումարյանը, սակայն, նշեց, որ Գրիգորյանը երբեք երեք միլիոն դրամ աշխատավարձ չի ստացել:

«Կարող եմ ասել, որ իմ աշխատավարձը կրճատվել է էականորեն: Ես առձեռն պետք է ստանամ 700 հազար դրամի կարգի գումար: Ես չգիտեմ, թե նախկին տնօրենը որքան էր ստանում»,- ասաց նա:

Գարեգին Խումարյանը տեղեկացրեց, որ ստեղծագործական գծով փոխտնօրենի հաստիքը կրճատվելու է, որը ստեղծվել էր այն ժամանակ, երբ Հանրային ռադիոյի տնօրեն նշանակվեց Արման Սաղաթելյանը: «Հաստիքացուցակն ենք վերանայում և այդ հաստիքը, ամենայն հավանականությամբ, չի լինելու»:

Նարեկ Կիրակոսյան