01.11.2024 | 23:19
Հրդեհ Գյումրու տներից մեկում
ՀՀ-ի բնակչությունը նախորդ տարվա համեմատ նվազել է 7․8 հազարով․ Արման Բաբաջանյանն իշխանությանը կոչ է անում երկիր վերադարձնել արտագաղթած քաղաքացիներին․ ՏԵՍԱՆՅՈՒԹ
Քաղաքականություն
07.05.2019 | 17:33
Ազգային վիճակագրական կոմիտեն այսօր՝ մայիսի 7-ին, հրապարակել է ՀՀ-ի մշտական բնակչության թիվը ապրիլի 1-ի դրությամբ, որը կազմում է 2 մլն 962 հազար մարդ, և որը նախորդ տարվա նույն ժամանակահատվածի համեմատ նվազել է 7․8 հազարով, իսկ տարվա սկզբի համեմատ՝ բնակչության թիվը նվազել է 3.2 հազարով․ այսօր խորհրդարանում ԱՎԿ ներկայացրած վիճակագրությունը ներկայացրեց ԱԺ «Լուսավոր Հայաստան» խմբակցության պատգամավոր Արման Բաբաջանյանը։
«Վաղը լրանում է պատմական օրը, որը բոլորիս հուսադրեց, որ երկրում սկիզբ է դրվելու ֆունդամենտալ այնպիսի փոփոխությունների, որոնք հանգեցնելու են արտագաղթի տեմպերի նվազման, հույս ունեինք, որ այն կարող էր դադարել և բացասական սալդոն կարող էր նույնիսկ դրականի փոխվել։ Ավաղ, երկրում նախկինից մնում են խնդիրներ, որոնք մարդկանց այսօր էլ մղում են արտագաղթի»,- ասաց պատգամավորը՝ նշելով, որ արտագաղթն անիրական պատերազմ է, որը հանգեցնելու է իրական պատերազմի, եթե մենք թուլանանք վերջնականապես։
Ըստ Արման Բաբաջանյանի՝ որպեսզի մենք թույլ չտանք հասնել պատերազմի, իշխանությունը պետք է անհրաժեշտ միջոցներ ձեռնարկի՝ ՀՀ-ից արտագաղթած քաղաքացիներին իրենց տուն վերադարձնելու համար։
«Իշխանության առաջիկա տարիներին կատարած աշխատանքը պետք է չափվի հենց այս ուղությամբ տարված աշխատանքով։ Մենք չենք կարող խոսել այստեղ կյանքի որակական փոփոխությունների մասին, իսկ մարդիկ շարունակեն լքել երկիրը։ Հայաստանը դատարկվել է ռազմավարական վտանգի աստիճան»,- ասաց պատգամավորը։
Մանրամասները՝ տեսանյութում։
