05.11.2024 | 23:30
ԱՄՆ նախագահական ընտրությունների արդյունքները դժվար թե վերականգնեն Թուրքիայի հետ հարաբերությունները. անդրադարձ
Վարչապետը հանձնարարեց վերանայել պետպատվերի ընտրության չափանիշները
Տնտեսություն
31.08.2017 | 11:40
ՀՀ Կառավարության այսօրվա նիստում վարչապետ Կարեն Կարապետյանի առաջին հանձնարարականը վերաբերում էր պետական պատվերի տեղաբաշխման մեխանիզմներին:
«Առողջապահության ոլորտում իրականացվող բարեփոխումների առումով առանցքային է պետական պատվերի տեղաբաշխման մեխանիզմների վերանայումը՝ ապահովելով բժշկական ծառայությունների մատուցման հասցեականության և պետական միջոցների հատկացման մրցակցային և թափանցիկ մեխանիզմները»,- նշեց վարչապետը:
Հաշվի առնելով վերոնշյալը՝ Կառավարության ղեկավարը առողջապահության նախարարին հանձնարարեց բժշկական ծառայությունների մատուցման արդյունավետության բարձրացման նպատակով երեքամսյա ժամկետում վերանայել պետպատվեր իրականացնող բժշկական հաստատությունների ընտրության չափանիշները՝ առաջնահերթություն տալով կազմակերպության ընդհանուր եկամուտների մեջ վճարովի ծառայությունների մասնաբաժնին:
«Երկրորդ՝ պետպատվեր իրականացնող խոշոր բժշկական հաստատություններում 2017 թվականից ներդնել պարտադիր տարեկան արտաքին աուդիտի անցկացում՝ ապահովելով համապատասխան իրավական մեխանիզմներ»,- շարունակեց Կարապետյանը:
Բացի այդ, վարչապետը հանձնարարեց երեքշաբաթյա ժամկետում կատարել թանկարժեք բժշկական ծառայությունների գնագոյացման վերլուծություն՝ հստակ տարանջատելով ծառայության ինքարժեքը և կառավարության աշխատակազմ ներկայացնել առաջարկություններ:
Հիշեցնենք, որ վերջերս որոշ լրատվամիջոցներում հրապարակումներ եղան այն մասին, որ առողջական խնդիրներ ունեցող բազմաթիվ քաղաքացիներ հայտնվել են փաստի առաջ, քանի որ նրանց բժշկական կենտրոններում ասվել է, որ պետպատվերի տեղերը սպառված են, և նրանք ստիպված են լինելու կամ ինքները վճարել, կամ սպասել մինչև մյուս տարի։
Շողիկ Գալստյան
