Բոլոր նախագահների օրոք իրենց շատ լավ զգացած գործարարները նույնկերպ են իրենց զգում նաև այսօր. ՏԵՍԱՆՅՈՒԹ

Մեր երկրում առևտրային ցանցերը գոյացել են տասնամյակների ընթացքում, մարդիկ փոքր մի խանութի ու կրպակի սեփականատերից կարողացել են դառնալ ահռելի հարստության և կապիտալի սեփականատեր՝ դառնալով խոշոր ներկրողներ և արտադրողներ, իսկ սա մեր շուկայի աքիլլեսյան գարշապարն է։ Այս մասին այսօր «Մենաշնորհների դեմ պայքար. ովքե՞ր են շուկայի հետհեղափոխական խաղացողները» թեմայով քննարկման ժամանակ ասաց ՀՊՏՀ ինովացիոն և ինստիտուցիոնալ հետազոտությունների կենտրոնի ղեկավար, տնտեսագետ Ատոմ Մարգարյանը։

«Բոլոր շղթաները կապված են եղել իրար․ արտադրության, ներկրման, վաճառքի մենաշնորհները վերահսկվել են։ Ես այս ժամանակահատվածը կանվանեի կապիտալի կուտակման ժամանակահատված, երբ բիզնեսի հաջողությունը կապված էր իշխանության մեջ լինելով և բարձրաստիճան պաշտոնյա լինելով, իսկ տնտեսական մենաշնորհներն էլ եղել են այդ քաղաքական մենաշնորհի մի մասը»,- ասաց տնտեսագետը։

Անդրադառնալով նոր Կառավարության՝ մենաշնորհների դեմ պայքարի խոստումներին՝ Ատոմ Մարգարյանը հիշեց, որ ինչպես այս Կառավարությունը, այնպես էլ նախորդ բոլոր 14 կառավարությունները, խոսել են մենաշնորհների դեմ պայքարի մասին և շուկայի ազատականացման վերաբերյալ արել են հայտարարություններ։

«Սակայն այդ խոստումներին և հայտարարություններին զուգահեռ՝ բոլոր ապրանքները՝ ալյուր, շաքարավազ, ընդեղեն, դեղեր, բենզին, դիզվառելիք, բանան և այլնի՝ եղել են կենտրոնացված։ Մենատերերը չարաշահել են իրենց մենաշնորհային դիրքը ՝ ունենալով որոշ դաբրոներ։ Օրինակ՝ նախորդ վարչապետներից Հովիկ Աբրահամյանը հանձնարարականներ էր տվել շուկաների վերաբերյալ ուսումնասիրություններ կատարել և դրա արդյունքների, բոլոր շղթայական կապերի մասին տեղեկատվությունը տեղադրել էկոնոմիկայի նախարարության կայքում, հիմա հարց՝ դուք տեսե՞լ եք, ես չեմ տեսել։ Այնպես որ, պետությունն արձանագրել է տեսանելի թվեր, կիրառել է որոշ պատժամիոցներ, բայց, ըստ էության, մենաշնորհը, որպես ստվերում գոյացող եկամուտ, որպես գերշահույթի աղբյուր՝ իր կենսունակությունը պահպանել է»,- ասաց տնտեսագետը՝ շեշտելով, որ հեղափոխությունից հետո տեղի են ունենում որոշակի վերադասավորումներ և ռեսթարթի գործընթաց։

«Սակայն մենք տեսնում ենք, որ բոլոր նախագահների օրոք իրենց շատ լավ զգացած գործարարներն այսօր էլ են իրենց նույնկերպ զգում։ Ինձ համար, թե այս նոր Կառավարության ազատականացումն ինչի է բերել, չի երևում, ոչ մի բանի էլ չի բերել, որովհետև գնային փոփոխություն տեղի չի ունեցել, օրինակ՝ միջին որակի բենզինը, որը 480 դրամ էր, այսօրերին մենք տեսնում ենք դրա գների բարձրացում։ Ավիափոխադրումների շուկայում ևս ոչինչ տեղի չի ունեցել․ այսօր մեքենաների ահռելի հոսք կա դեպի Վրաստան, մարդիկ մեքենայով հասնում են այնտեղ՝ այլ երկրներ մեկնելու համար, քանի որ 60-80 տոկոսով թանկ են ավիատոմսերը»,- ասաց տնտեսագետը։

Ատոմ Մարգարյանը վստահեցնում է նաև՝ տնտեսական մենաշնորհների հաղթահարման հավաստիացումները պետք է գնահատել գնային ստատուս քվոյի փոփոխությամբ, որը, սակայն, նույնն է մնացել։

Մանրամասները՝ տեսանյութում։