24.06.2026 | 20:10
Զինվորի տունը՝ նաև երեխաների համար․ վերականգնողական նոր բաժանմունք է բացվել. ՏԵՍԱՆՅՈՒԹ
Կոտայքի մարզի Նոր Գեղի-Արգել-Արզական-Հրազդան ճանապարհահատվածի 65%-ը հիմնանորոգվել է
Տնտեսություն
30.08.2017 | 18:41
Կենսական նշանակության ճանապարհային ցանցի բարելավում» ծրագրի շրջանակներում Կոտայքի մարզի Նոր Գեղի-Արգել-Արզական-Հրազդան ճանապարհահատվածում շարունակվում են հիմնանորոգման աշխատանքները:
ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանն այցելեց նշված ճանապարհահատված, մանրակրկիտ դիտարկեց կատարված աշխատանքները, միաժամանակ իր նկատառումները հայտնեց այն հատվածների վերաբերյալ, որտեղ աշխատանքի որակը գոհացուցիչ չէ:
Նախարարը տեխհսկիչներին հանձնարարեց որակի ամենօրյա հսկողություն իրականացնել: «Հայավտոճան տնօրինություն» ՊՈԱԿ-ի տնօրեն Աշոտ Արշակյանը հայտնեց, որ լաբորատոր հետազոտությունները պարտաճանաչ իրականացվում են:
«Բոլոր հատվածներում, մինչև ասֆալտը տեղադրելը, նմուշները բերվում են լաբորատորիա, հատիկական կազմը, բաղադրությունը, ասֆալտի տիպը որոշելուց հետո նոր միայն տեխհսկիչների միջոցով թույլատրվում է տեղադրել»:
Շինաշխատանքներն այս ճանապարհահատվածում մեկնարկել են անցած տարվա սեպտեմբերին: Արդեն կատարվել են ճանապարհահատվածի 9,84 կմ ասֆալտապատման, հենապատերի վերանորոգման ու նոր հենապատերի կառուցելու աշխատանքները:
Դրանց բետոնյա մակերեսի վերաբերյալ ևս նախարարը դիտողություններ արեց, ճանշինի ղեկավարը խոստացավ շտկել թերությունները.
Կատարվում են նաև կամուրջների վերականգնման աշխատանքներ: Նախարարը, դիտարկելով այստեղ իրականացվող շինարարությունը, ճանապարհաշինական ընկերության ուշադրությունը հրավիրեց ճանապարհամերձ հատվածներն ու ջրատար վաքերն աղբից մաքուր պահելու խնդրին:
Շարունակվում են ջրահեռացման համակարգի և մայթերի վերականգնման, անվտանգության տարրերի տեղադրման աշխատանքները:
Փաստացի կատարված աշխատանքների առաջընթացն այս պահին կազմում է շուրջ 65%: Ըստ պայմանագրի՝ շինարարությունը պետք է ավարտվի նոյեմբերի վերջին, սակայն ճանապարհաշինարարները խոստանում են ճանապարհը շահագործման հանձնել ժամկետից շուտ` պահպանելով որակական չափանիշները:
