16.01.2026 | 15:26
«Ուրարտուի» սանը մահացել է 18 տարեկանում
Շիրակի մարզպետարանում օպտիմալացման գործընթաց դեռևս չկա
03.05.2019 | 13:58
Շիրակի մարզպետարանում օպտիմալացման գործընթացը դեռ չի սկսվել: Այս մասին Factor.am-ի հետ զրույցում տեղեկացրեց Շիրակի մարզպետարանի մամուլի պատասխանատու Արաքս Կիրակոսյանը: Մեր հարցին, որ կան խոսակցություններ, որոնց համաձայն՝ արդեն կրճատումների գործընթաց է սկսվել, Արաքս Կիրակոսյանը պատասխանեց, որ նման բան չկա:
«Օպտիմալացումն ընդհանուր գործընթաց է: Օպտիմալացում էլ չէ, այլ կառուցվածքային փոփոխություն է: Որևէ կառուցվածքային փոփոխության մասին մենք դեռևս պաշտոնական որևէ բան չենք ստացել: Եթե Կառավարությունից որևէ որոշում չկա, ո՞նց կարող է սկսվել»,- ասաց մարզպետարանի մամուլի պատասխանատուն:
Նա հավելեց, որ որևէ նոր կառուցվածքային փոփոխության ու նոր կրճատումների մասին ոչ միայն հայտարարություն չի եղել, այլև ներքին խոսակցություն:
Հիշեցնենք, որ տարեսկզբին ՀՀ տարածքային կառավարման և զարգացման նախարար Սուրեն Պապիկյանը հայտարարեց, որ մարզպետարանների աշխատակիցների 30%-ը պիտի կրճատվի: Այս որոշումը կայացվել էր խորհրդատվական մի ընկերություն ուսումնասիրության արդյունքների հիման վրա: Կառավարությամբ պարզաբանմամբ՝ օպտիմալացման նպատակն է՝ ապահովել արդյունավետ կառավարում և ներգրավել առավել որակյալ մասնագետների:
Էմմա Չոբանյան
