10.01.2025 | 22:13
Ադրբեջանական SOCAR-ը վաճառել է Թուրքիայի գազաբաշխման իր 2 խոշորագույն ընկերությունները
Լոնդոնի դատարանը Ջուլիան Ասանժին 50 շաբաթվա ազատազրկման է դատապարտել
01.05.2019 | 17:11
Լոնդոնի դատարանը WikiLeaks-ի հիմնադիր Ջուլիան Ասանժին 50 շաբաթվա ազատազրկման է դատապարտել՝ գրավի դիմաց ազատ արձակվելու պայմանները խախտելու համար: Այս մասին հաղորդում է ՌԻԱ Նովոստին:
«Դուք սեփական կամքով չեք հանձնվել ոստիկանությանը, Էկվադորի դեսպանատունը ստիպված է եղել ոստիկանությանը շենք մտնելու թույլտվություն տրամադրել… Դուք ընտրություն ունեիք, և ես մերժում եմ պատիժը մեղմելու հետ կապված բոլոր փաստարկները»,- ասել է դատավճիռը հրապարակած դատավոր Դեբորա Թեյլորը:
Նա նշել է, որ իրավախախտման լրջությունն Ասանժի պատժաչափը մոտեցնում է առավելագույնին, որը կազմում է 12 ամիս: Սակայն առավելագույն պատիժ դատավորը, այնուամենայնիվ, չի սահմանել, քանի որ WikiLeaks-ի նրան ներողությամբ նամակ է փոխանցել:
Հիշեցնենք, որ 2012 թվականից Լոնդոնում Էկվադորի դեսպանատանը թաքնվող Ջուլիան Ասանժին բրիտանական ոստիկանությունը ձերբակալեց ապրիլի 11-ին: Նա ձերբակալվեց 2012թ. տրամադրված ծանուցագրի հիման վրա՝ բրիտանական դատարան չներկայանալու համար: Միաժամանակ, նրան մեղադրանքներ են առաջադրել Շվեդիան (բռնաբարության համար) և ԱՄՆ-ն (նախկին զինվորականների հետ դավադրության և նրանց կողմից հափշտակված ծառայողական փաստաթղթերը հրապարակելու համար):
Մինչև հունիսի 12-ն էլ ԱՄՆ-ն պետք է Մեծ Բրիտանիային ներկայացնի արտահանձնման համար անհրաժեշտ բոլոր փաստաթղթերը: Ասանժի պաշտպանական խումբը մտավախություն ունի, որ ԱՄՆ-ին արտահանձնելու դեպքում նրան կարող է մինչև 35 տարի ժամկետով ազատազրկում կամ մահապատիժ սպառնալ, մինչդեռ ԱՄՆ արդարադատության նախարարությունը պնդում է, որ նրան 5 տարվա բանտարկություն է սպառնում հաքերային գործունեության համար:
