Հասարակություն
30.04.2019 | 16:29Ճանապարահային ոստիկանությունում հրաժարվում են մեկնաբանել ՀՀ վարչապետ Նիկոլ Փաշինյանի այն հայտարարությունը, որ արագաչափ սարքերն ու տեսախցիկները պատկանում են Սերժ Սարգսյանի եղբորը՝ Սաշիկ Սարգսյանին: ՃՈ պետ Եգոր Կարապետյանը հրաժարվեց պատասխանել Factor.am-ի հարցին, թե ո՞ւմ է պատկանում արագաչափերի բիզնեսը:
Ոստիկանությունում հրավիրված մամուլի ասուլիսի ժամանակ նա առաջարկեց, որ մեր հարցին պատասխանի իր տեղակալ Արմեն Չիլինգարյանը: Վերջինն էլ ուշագրավ հայտարարություն արեց. «Որպես այդպիսին՝ արագաչափերի բիզնես գոյություն չունի: Ճանապարհային ոստիկանության կողմից օգտագործվող ամբողջ գույքը, այդ թվում՝ արագաչափերն ու տեսախցիկները, հանդիսանում են պետության սեփականությունը: Մի բան է, որ դրանք տրված են հավատագրմային կառավարման, բայց ասել, որ դա արագաչափերի բիզնես է, կարծում եմ, ճիշտ չէ, իրականությանը չի համապատասխանում»:
Հիշեցնենք, որ ապրիլի 23-ին Նիկոլ Փաշինյանը ֆեյսբուքյան ուղիղ եթերի ժամանակ հայտարարել էր, թե ներվել է արագաչափերի տուգանք՝ 13 միլիարդ դրամի չափով: Վարչապետը կրկին օգտագործել էր «Սաշիկի արագաչափեր» արտահայտությունը:
Ճանապարհային ոստիկանությունում բոլոր հնարավոր մեթոդներով շրջանցում են մեկնաբանել, թե Նիկոլ Փաշինյանն ինչո՞ւ է այդքան վստահ արագաչափերը կապում Սաշիկ Սարգսյանի հետ, եթե այն պետական գույք է համարվում: «Կներեք, բայց երկրի ղեկավարի հայարարությունները մեր կողմից մեկնաբանելը կոռոկտ չի»,- ասաց Արմեն Չիլինգարյանը:
Մանրամասները՝ տեսանյութում:
Նարեկ Կիրակոսյան
