20.04.2026 | 23:38
Ովքեր են «Հանրապետություն» կուսակցության ցուցակում․ հրապարակվել են առաջին 30 անունները
Այսօր Հայաստանը դինամիկ զարգացող պետություն է, որին բնութագրական է քաղաքական կայունությունը. Նիկոլ Փաշինյան. ՏԵՍԱՆՅՈՒԹ
Տնտեսություն
30.04.2019 | 15:03
Հայաստանի Կառավարությունն իրականացնում է մասշտաբային բարեփոխումներ, որոնց նպատակը մրցունակ և տեխնոլոգիական զարգացող տնտեսություն ձևավորելն է։ ԵՏՄ միջկառավարական խորհրդի ընդլայնված նիստում ունեցած ելույթում այս մասին ասաց ՀՀ վարչապետ Նիկոլ Փաշինյանը։
«Վերջին տարիներին մեզ հաջողվել է հասնել շոշափելի արդյունքների կոռուպցիայի դեմ պայքարում, ինչպես նաև բոլոր քաղաքացիների համար հավասար պայմանների ապահովման, դատական համակարգի անկախության ամրապնդման ուղղությամբ։ Մեզ հաջողվել է նվազագույնի հասցնել մոնոպոլիաների և օլիգապոլիաների գործունեությունը։ Այսօր Հայաստանում որևէ մեկը չի կարող օգտագործել իր քաղաքական ազդեցությունը տնտեսական նպատակներով։ Դա իր հերթին առողջացրել է տնտեսական և քաղաքական մթնոլորտը, և չեմ վախենա ասել՝ բարոյական մթնոլորտը հասարակությունում ընդհանրապես։ Մենք նաև օպտիմալացնում ենք պետական կառավարման համակարգը, ինչն ուղղված է կառավարական կառույցների արդյունավետության բարձրացմանը։ Բոլոր այս քայլերն ուղղված են մեր քաղաքացիների համար հավասար պայմանների ստեղծմանը, նրանց՝ ինտելեկտուալ և գործարար պոտենցիալի ազատ իրացմանը։ Այսօր Հայաստանը դինամիկ զարգացող պետություն է, որին բնութագրական է քաղաքական կայունությունը»,- ասաց վարչապետը:
Նա նշեց, որ կառավարման խորհրդարանական համակարգը բարձրացնում է հաշվետվողականությունը. «Այդ ամենը տեղի է ունենում երկրում առավել տեսանելի ժղովրդավարական ինստիտուտների, քաղաքացիական հասարակության կայացման, ազատությունների ֆոնին։ Մեր կառավարությունն այսօր ունի լեգիտիմության բարձր մակարդակ և հասարակական անվիճելի բարձր վստահություն»։
Վարչապետի խոսքով՝ 2018 թվականին Հայաստանից արտահանումը դեպի ԵՏՄ երկրներ կազմում է ամբողջ արտահանման ծավալի 28%-ը, աճ է գրանցվել նաև ԵՏՄ երկրների հետ առևտրաշրջանառության ոլորտում։ Նիկոլ Փաշինյանն առանձնահատուկ ընդգծեց ԵՏՄ տարածքում էներգակիրների միասնական շուկա ձևավորելու և ընդհանուր էլեկտրաէներգետիկ շուկայի ստեղծման անհրաժեշտությունը:
Նշենք, որ Երևանում ընթացող Եվրասիական միջկառավարական խորհրդի նիստի օրակարգում ընդգրկված է 13 հարց, որոնցից 8-ը քննարկվել է նեղ կազմով հանդիպմանը: Մնացած հարցերը քննարկվելու են ընդլայնված կազմով նիստի ժամանակ: ԵՏՄ միջկառավարական խորհրդի նիստին մասնակցելու համար Հայաստան են ժամանել Ղրղզստանի վարչապետ Մուհամեդկալի Աբիլգազիևը, Բելառուսի վարչապետ Սերգեյ Ռումասը, Ռուսաստանի վարչապետ Դմիտրի Մեդվեդևը, Ղազախստանի վարչապետ Ասքար Մամինը և Եվրասիական տնտեսական հանձնաժողովի կոլեգիայի նախագահ Տիգրան Սարգսյանը: Վարչապետ Նիկոլ Փաշինյանն է ներկայացնում Հայաստանը խորհրդի նիստում:
Ըստ օրակարգի՝ կառավարությունների ղեկավարներն առանձնահատուկ ուշադրություն կդարձնեն ԵՏՄ թվային օրակարգի իրականացմանը։ ԵՏՄ շրջանակում ինտերնետային առևտրի զարգացման հեռանկարները, նիստի մասնակիցները կհաստատեն արտատնտեսական գործունեության կարգավորման համակարգում միասնական պատուհանի ազգային մեխանիզմի էտալոնային մոդելը:
