Սա իշխանափոխանցում էր, եթե ոչ՝ ապա ինչո՞ւ էր Սերժ Սարգսյանը սխալ․ ազատամարտիկները դժգոհ են գործող իշխանությունից

«Արժանապատիվ ազատամարտիկ»  ՀԿ նախագահ, պահեստազորի գնդապետ Վոլոդյա Ավետիսյանի համոզմամբ՝ գործող իշխանությունները ազգային, պետական մոտեցում չեն դրսևորում որոշ հարցերում։

Այս մասին այսօր՝ ապրիլի 29-ին, հրավիրված մամուլի ասուլիսի ժամանակ ասաց Ավետիսյանը՝ նշելով, որ իրենց հատկապես անհանգստացնում է ազատամարտիկների նկատմամբ իշխանության վերաբերմունքը։

«Մարդն ունի պատերազմի մասնակցի կարգավիճակ, ու այն մարդը, որն ունի պատերազմի մասնակցի կարգավիճակ, ծառայել է բանակում և գնացել է թոշակի, ստանում է 5000 դրամ հավելյալ գումար, իսկ մարդը, որը հաշմանդամի թոշակ է ստանում, չի ստանում այդ 5000 դրամը։ Օրինակ՝ ապրիլյան պատերազմում վիրավորված զինվորներին բուժելու համար կայքերի միջոցով փող են հավաքում, բա ո՞ւր մնացին 1000 դրամները։ Ու շատ կան այդպիսիք, որոնց մեր պետությունը պետք է բուժի, բայց չի անում։ Հիմա կասեն գումար չկա։ Օրինակ, հանքերի գումարն ո՞ւր է գնում, ի՞նչ եղավ Քոչարյանի փայատեր լինելը, մյուսների փայատեր լինելը հանքերին։ Մեր երկրի հարստությունն ո՞ւր է գնում, եթե չի ծառայում մեր ժողովրդին, մեր երկրին»,- ասաց  պահեստազորի գնդապետը։

Լրագրողների հարցին՝ արդյոք փորձե՞լ են հանդիպել Նիկոլ Փաշինյանի հետ, ներկայացնել իրենց մտահոգությունները, Ավետիսյանն ասաց․ «Իրենք բոլորը մեր երկրից են, ամեն ինչ լավ գիտեն, եթե ցանկանում են օգնել, պետք է անեն, Պաշտպանության նախարարություն և սոցիալական բաժնի պետ կա, որոնք այս խնդիրները պետք է բարձրացնեն, վարչապետը պետք է պահանջի։ Եթե չգիտի, ուրեմն վարչապետը իր տեղում չէ, պաշտպանության նախարարն էլ իր տեղում չի»։

Անդրադառնալով  Պաշտպանության նախարարության գործողություններին՝ Ավետիսյանը  հիշեց Մեղրիի զորամասի հետ կապված միջադեպը․ «Այդ դեպքի համար պաշտպանության նախարարը պետք է դիմում գրեր, գնար։ Ի՞նչ է նշանակում զորամասում նայող լինել, նայողն է ասում, թե զորքն ինչ անի, սա խայտառակ վիճակ է, այդ դեպքի համար պաշտպանության նախարարը պետք է դիմում գրեր, գնար։ Նա չի տիրապետում իրավիճակին»։

Ասուլիսին մասնակից «Արժանապատիվ ազատամարտիկ» ՀԿ խորհրդի նախագահ Գագիկ Սարուխանյանն էլ նշեց, որ ազատամարտիկը, որը երկիր է փրկել, Արցախ է ազատագրել, անկախություն է պարգևել, իրավունք ունի և պարտավոր է արժանապատիվ ապրել։

«Մեծ հույսեր ունեինք 1 տարի առաջ տեղի ունեցած, այսպես կոչված, հեղափոխությունից, սակայն իրականում դա իշխանափոխանցում էր, իշխանափոխություն էլ չէր։ Եթե սա իշխանափոխանցում չէր, ապա ինչո՞ւ էր Սերժ Սարգսյանը սխալ։ Ես ու իմ ընկերները մարդկանց ոտքի էինք հանում, երբ Նիկոլ Փաշինյանը Գյումրիից Երևան էր քայլում։ Հակառակ դեպքում լինելու էր այն 200-400 հոգանոց հավաքը, որը կազմակերպվել էր գների թանկացման դեմ։ Հիմնականում մարդկանց ոտքի հանելը եղել է մեր շնորհիվ»,- ասաց նա։

Աղավնի Սուքիասյան