18.10.2026 | 20:17
«Մեր նպատակը նոր խոստումներ տալը չէ, այլ ստանձնած պարտավորությունները կատարելը»․ Մաթևոսյան․ ՏԵՍԱՆՅՈւԹ
Իսրայելի կողմից Հայոց ցեղասպանությունը չճանաչելն ամոթալի է և ոչ բարոյական. Foreign Policy
Քաղաքականություն
24.04.2019 | 17:10
Ամերիկյան Foreign Policy պարբերականը «Իսրայելի կողմից Հայոց ցեղասպանությունը չճանաչելն ամոթալի է և ոչ բարոյական» վերնագրով հոդվածում անդրադարձել է Թել Ավիվի կողմից 1915 թվականի իրադարձությունները «ցեղասպանություն» չճանաչելու պատճառներին:
Հոդվածում մասնավորապես նշվում է. «Քայլելով Ծիծեռնակաբերդի հուշահամալիրում՝ անհնար է չնկատել Երուսաղեմի հետ ցայտուն նմանությունը: Հուշահամալիրից դեպի Երևան բացվող տեսարանը հիշեցնում է Հոլոքոստի ժամանակ զոհված 6 միլիոն հրեաների հիշատակը հավերժացնող գլխավոր հուշահամալիրից՝ Յադ Վաշեմից բացվող տեսարանը: Չնայած ընդհանուր ցավին ու ողբերգությանը՝ Իսրայելը երկար տարիներ Հայոց ցեղասպանության ճանաչման հարցում վախեցել է Թուրքիայի զայրույթից: 1950-ականների վերջից Թուրքիան մահմեդական աշխարհում Իսրայելի եզակի բարեկամներից էր: Երկու երկրների հետախուզական ու պաշտպանական հաստատությունների միջև սերտ կապ է եղել, և Թուրքիան իսրայելական զենքի համար կարևոր ու շահութաբեր շուկա է եղել։
Այսօր՝ թուրք-իսրայելական հարաբերությունների վատթարացման ֆոնին, երկրի պաշտոնական իշխանություններն ունեն հերթական պատճառը՝ չճանաչելու համար 1915թ.-ի ողբերգությունը, այն է՝ Ադրբեջանի հետ ռազմատեխնիկական համագործակցությունը։
Անկախ գաղափարախոսությունից և քաղաքական կողմնորոշումից՝ գիտակցելով, որ վարած քաղաքականության ցանկացած փոփոխություն կարող է զայրացնել Թուրքիային և վտանգի ենթարկել զենքի վաճառքը, Իսրայելի հետևողական կառավարությունը տնտեսական շահը համամարդկային արժեքներից վեր է դասել՝ համաձայնելով Հայոց ցեղասպանությունը պարզապես «ողբերգություն» անվանել»:
Նելլի Մելքոնյան
