06.12.2025 | 15:08
Մահացել է վիրաբույժ Արտավազդ Սահակյանը
Ինչո՞ւ է Դավիթ Սանասարյանի և ՊՎԾ աշխատակիցների գործով կարևոր դերակատարը դարձել անհասանելի
Հասարակություն
24.04.2019 | 14:18
Factor.am-ի տեղեկություններով ՊՎԾ աշխատակիցների գործով ստորագրությամբ ազատ արձակված Գևորգ Խաչատրյանը ազատության մեջ հայտնվելուց հետո փոխել է իր հեռախոսահամարը, բնակության հասցեն, ինչպես նաեւ հրաժարվել է փաստաբան Արման Արզումանյանի ծառայություններից։ Նրա գործով հանրային պաշտպան է ներգարվվել՝ Սիրուշ Հարությունյանը։
Լուրը փորձեցինք ճշտել Խաչատրյանի պաշտպան Սիրուշ Հարությունյանից: «Ես տեղեկություն չունեմ, այդպես մանրամասն չեմ կարող ասել, ես իր հետ խոսում եմ, փոխված համարն է, թե չէ՝ ասել չեմ կարող, բայց մեր կապը կա»,- փոխանցեց նա։
Նշենք, որ Խաչատրյանի նախկին հեռախոսահամարն անընդմեջ անհասանելի է։
Մեր տեղեկություններով՝ ազատության մեջ հայտնվելուց հետո Գևորգ Խաչատրյանն ընդհանրապես մեկուսացել է, այն աստիճան, որ անգամ իր աշխատանքից ազատվելու դիմումը անձամբ չի ներկայացրել աշխատավայր, այլ այն ուղարկել է ծրարով։ Այս փաստն, ի դեպ, մեզ հետ զրույցում հաստատեցին ՊՎԾ-ից։
Հիշեցնենք, որ ԱԱԾ-ն հայտարարեց, որ քրեական գործ է հարուցվել Պետական վերահսկողական ծառայության (ՊՎԾ) գնումների գործընթացների վերահսկողության վերաբերյալ՝ պաշտոնեական դիրքի չարաշահման և այլ հոդվածներով։ Մասնավորապես, հեմոդիալիզի պարագաների մրցույթների գործով մեղադրանք էր առաջադրվել ծառայության աշխատակիցներից՝ գնումների վերահսկողության վարչության պետ Սամվել Ադյանին և բաժնի գլխավոր մասնագետ Գևորգ Խաչատրյանին, որը ստորագրությամբ ազատ է արձակվել։
Սամվել Ադյանն էլ, ամենայն հավանականությամբ, ազատ կարձակվի վաղը, քանի որ լրանում է նրա կալանքի տակ գտնվելու երկամսյա ժամկետը։ Իսկ դատարանը օրերս մերժեց Ազգային անվտանգության ծառայության (ԱԱԾ) միջնորդությունը՝ Ադյանի կալանքը ևս երկու ամսով երկարացնելու վերաբերյալ։
ՊՎԾ պաշտոնյաների կողմից պաշտոնեական լիազորությունները չարաշահելու և ծանր հետևանքներ առաջացնելու մասին քրեական գործով մեղադրանք է առաջադրվել նաև ՊՎԾ պետ Դավիթ Սանասարյանին, նրա լիազորությունները կասեցվել են:
Ի դեպ, Պետական վերահսկողության ծառայության աշխատակիցների հետ նույն գործի շրջանակներում կալանավորված «Զորաշեն» ՍՊԸ-ի հաշվապահ Տարոն Ավետիսյանը նույնպես ազատ է արձակվել:
Լիլիթ Շաբոյան
