Քաղաքականություն
22.04.2019 | 21:29Մեկ տարի առաջ այս օրվա առավոտյան հանգուցալուծվում էր 22 օր առաջ սկսված հեղափոխությունը՝ ուղիղ եթերում պիտի հանդիպեին հեղափոխության առաջնորդն ու Հայաստանի վարչապետը:
«Մենք բանակցություններին համաձայնվել ենք միայն մի պայմանով՝ դա վերաբերվում է իշխանությունից Սերժ Սարգսյանի հեռացման, հրաժարականին, և իշխանության խաղաղ փոխանցմանը»,- հանդիպման մեկնելուց առաջ ֆեյսբուքյան եթերով տեղեկացնում է Նիկոլ Փաշինյանը։
Առավոտից մարդաշատ է «Մարիոտ» հյուրանոցի մուտքը, հրաժարականի բանակցություններն այստեղ են տեղի ունենալու: Լրագրողները ներսում են, ամեն ինչ լինելու է ուղիղ եթերում, Հանրապետության հրապարակում։ Սերժ Սարգսյանը և Նիկոլ Փաշինյանը բանակցությունների սրահ են մտնում միասին: Վարչապետը նստում է անմիջապես։ Նա ընդամենը կոստյումի կոճակներն է արձակում։ Նիկոլ Փաշինյանն ավելի մանրամասն է նստում։ Նա վարչապետին սպասեցնում է ուսապարկից ազատվելով, բաճկոնը հանելով։ Հենց սկզբից նրանց զրույցը չի ստացվում:
«Անկեղծ ասած, ես մի քիչ լավ չեմ պատկերացնում տասնյակ լրագրողների ներկայությամբ ինչքան կարող ենք բանակցել»,- ասում է Սերժ Սարգսյանը։
Նիկոլ Փաշինյանը միանգամից է անցնում հակահարձակման՝ մենք չենք երկխոսելու, ես եկել եմ, որ քննարկեմ ձեր հրաժարականի պայմանները։ Սերժ Սարգսյանը ժպտում է՝ Նիկոլ Փաշինյանը չի գիտակցում պատասխանատվության աստիճանը, որոշ բաներ պետք է հիշեցնել նրան:
«Դուք դասեր չեք քաղել Մարտի 1-ից և եթե էդ տոնով պետք է խոսեք, ինձ մնում է ձեզ մեկ անգամ ևս խորհուրդ տալ, որպեսզի գաք օրինական դաշտ և ընդհանրապես տրամաբանական գործողությունների դաշտ, հակառակ պարագայում ամբողջ պատասխանատվությունն ընկնում է Ձեր վրա, ընտրեք»,-հորդորում է վարչապետը։
Նիկոլ Փաշինյանը Սերժ Սարգսյանին տեղեկացնում է, որ նրա գնացքը գնացել է, ինքն այլևս չունի այն իշխանությունը, որով կարող է վախեցնել հեղափոխությանը:
-Իրավիճակը Հայաստանում փոխվել է,- ասում է Նիկոլ Փաշինյանը,- Դուք ՀՀ-ում չունեք էն իշխանությունը, ինչի մասին Ձեզ զեկուցում են։ ՀՀ-ում իշխանությունն անցել է ժողովրդի կողմը։
-Ժողովրդի անունից 7-8 տոկոս տարած խմբակցությունն իրավունք չունի խոսելու»,- հակադարձում է Սերժ Սարգսյանը:
Վերջինս այլևս մտադիր չէ շարունակել բանակցությունները, հետևությունները թողնում է լրագրողներին։ Փաշինյանը լրագրողներին վստահեցնում է, որ Մարտի 1-ով սպառնացող Սերժ Սարգսյանն այլևս ադեկվատ չէ։ Հյուրանոցից հեղափոխության առաջնորդը գնում է Էրեբունի համայնք։ Ոստիկանությունը հասցնում է հայտարարել, որ կայացնում է հավաքները դադարեցնելու որոշում։ Էրեբունիում իշխանությունը պատրաստ է ընդունել հեղափոխության մարտահրավերը: Այնտեղ Փաշինյանին է մոտենում Երևանի փոխոստիկանապետ Վալերի Օսիպյանը։ Նա չի էլ հասցնում տեղեկացնել, որ հավաքները դադարեցված են, ոստիկանության մյուս ուժերն առևանգում են Նիկոլ Փաշինյանին հենց ուղիղ եթերում: Երկար քաշքշուքից հետո Նիկոլ Փաշինյանին և Արարատ Միրզոյանին տանում են անհայտ ուղղությամբ։ Իշխանությունը հույս ունի Էրեբունիով կանգնեցնել հեղափոխությունը։ Այստեղ պայթում են լուսաձայնային նռնակներ, իրականացվում են զանգվածային ձերբակալություններ, գործողություններն անձամբ է ղեկավարում փոխոստիկանապետ Լևոն Երանոսյանը, այստեղ են նետվել և կարմիրբերետավորները և սևդիմակավորները: Բերման ենթարկվածների մեջ է նաև Ազգային Ժողովի պատգամավոր Սասուն Միքայելյանը: Քիչ հետո հայտնի է դառնում, որ Սասուն Միքայելյանն ու Արարատ Միրզոյանը տարվել են ոստիկանության Շենգավիթի բաժին։ Նիկոլ Փաշինյանի գտնվելու վայրն անհայտ է։ Նրա տիկինը ամուսնու գտնվելու վայրից տեղեկություն չունի և մտադիր չէ ղեկավարել շարժումը:
«Ես չեմ կարող շարժում ղեկավարել, ես մեկն եմ էստեղ հավաքվածներից»,- ասում է Աննա Հակոբյանը։
Քաղաքացիները բերման են ենթարկվում նաև Հանրապետության հրապարակից: Փոխվարչապետ Կարեն Կարապետյանը հայտարարություն է տարածում, ըստ որի՝ հիասթափված է, Փաշինյանը «Մարիոթ» էր եկել ոչ թե բանակցելու, այլ իր պայմանները թելադրելու։ Սկսվում է ժողովրդի կուտակումը ոստիկանության Շենգավիթի բաժնի առաջ, իսկ Էրեբունիում ժողովրդի վրա հարձակվում են արդեն ոչ ոստիկանական համազգեստով մարդիկ:
«Քարով հարձակվել են ու խփել, ընդամենը ուղիղ քայլելուց։ Դուբինկեքով ու էլեկտրաշոկերով հարձակվեցին, ասեցին՝ աղջի, հլը էս կողմ արի»,- պատմում են բռնության ենթարկված մի երիտասարդ ու մի աղջիկ։
Արթուր Դավթյանի գլխավորած դատախազությունը տարածում է պաշտոնական հայտարարություն, ըստ որի՝ ձերբակալվել են Նիկոլ Փաշինյանը, Արարատ Միրզոյանը և Սասուն Միքայելյանը, նրանք «բռնվել են հանրորեն վտանգավոր արարքների պահին»։ 15։47-ին Նիկոլ Փաշինյանը ժողովրդին կոչ է անում հավաքվել Հանրապետության հրապարակում, իրենք վերահսկում են իրավիճակը, իր գտնվելու վայրի մասին ոչ մի խոսք։ Այդ ընթացքում Ոստիկանությունն ուժեղացնում է հսկողությունը Շենգավիթի բաժնում: «Ելք» խմբակցության պատգամավոր Մանե Թանդիլյանը հեղափոխության կողմնակիցներին և իշխանություններին պարտավորեցնում է ցուցաբերել զսպվածություն և վերսկսել երկխոսությունը։ Իսկ ինքը Գևորգ Գորգիսյանի հետ շարժվում է ոստիկանության Շենգավիթի բաժանմունք, որտեղ քաղաքի տարբեր հատվածներից շարունակում է հավաքվել ժողովուրդը: Հեղափոխությանն աջակցում են նաև շոու բիզնեսի աստղերը։ Դերասան Մկրտիչ Արզումանյանը և երգիչ Էռնա Յուզբաշյանը հայտարարում են, որ հրաժարվում են իշխանության շնորհած վաստակավոր արտիստի կոչումից։ Կոչով հանդես է գալիս նաև հանրապետության նախագահը։ Նա կողմերին հորդորում է ապրիլի 24-ի նախօրյակին չմասնատել հասարակությանը: Երեկոյան ժողովուրդը հավաքվում է Հանրապետության հրապարակում, արդեն հայտնի է, որ Փաշինյանը գտնվում է Էրեբունու ձերբակալված անձանց ժամանակավոր պահման վայրում։ Հրապարակում հիշում են Սերժ Սարգսյանի վերջին խոսքերը:
«Ասում ա՝ Նիկոլ Փաշինյան, դու պետությանն ես սպառնում, պետության հետ ես խոսում։ Դո՞ւ ես պետությունը, Սերժ, պետությունն էստեղ ա»,- բղավում է «Քայլ արա, մերժիր Սերժին» շարժման անդամ Սուրեն Պապիկյանը։
Պատգամավորների ձերբակալությունը դատապարտում է նաև «Բարգավաճ Հայաստան» կուսակցությունը։ Սակայն նա նույնպես կողմերին կոչ է անում վերսկսել բանակցությունները բախումները բացառելու համար։ Չնայած Նիկոլ Փաշինյանի բացակայությանը, Հանրապետության հրապարակը լիքն է ինչպես երբեք:
«Նոր ես կարդացի ինտերնետում մոտավոր հաշվարկը, թե քանի հոգի ենք մենք էստեղ՝ առնվազն 160 հազար։ Սերժ, էսի 7 տոկոս չի, էս ամբողջ ժողովուրդն ա, ո՞ւր ա քո 700 հազարը, ՍերԺ»,- ազդարարում է «Քայլ արա, մերժիր Սերժին» շարժման անդամ Ռուբեն Ռուբինյանը։
Հրապարակում պայմանավորվում են առավոտյան վերսկսել փողոցների փակումը Հայաստանի ամբողջ տարածքում, որոնք կուղեկցվեն դասադուլներով և գործադուլներով։ Հայաստանում մթնում էր Սերժ Սարգսյանի իշխանության վերջին օրը:
Մհեր Արշակյան
