«Նաիրիտում» հրդեհը վերջնականապես դեռ չի մարվել. նոր մանրամասներ

Քիմիական երբեմնի հսկա «Նաիրիտ» գործարանում այսօր արտակարգ իրավիճակ էր: Կեսօրին Արտակարգ իրավիճակների նախարարությունը հայտնեց, որ գործարանի տարածքում տեղի է ունեցել պայթյուն, ապա բռնկվել  հրդեհ: Եվ չնայած  նախարարությունից հայտնում են, որ ժամը 14:00-ի սահմաններում այն մեկուսացվել է, մինչ այժմ էլ կրակի շերտերը դեռ երևում են, իսկ ծուխը շարունակում է տարածվել գործարանի և հարակից տարածքներով:

Հրդեհի բռնկման պատճառը դեռևս հայտնի չէ, նախարարությունից միայն տեղեկացրել են, որ նախնական տվյալներով հրդեհի վայրում՝ «Նաիրիտ 1»-ի տարածքում՝ 4 երկաթբետոնյա տարրայում (յուրաքանչյուրը՝ մոտ 100 խմ) այրվել է էթինոլ (լաք) տեսակի քիմիական նյութ՝ ընդհանուր մոտ 200 խմ:

ԱԻՆ Ճառագայթային, քիմիական, կենսաբանական մոնիթորինգի բաժնի պետ, գնդապետ Վալերի Բագիյանը դեպքի վայրում հիշեցրեց՝ նման դեպք գործարանում գրանցվել է  նաև տարիներ առաջ:

Նշենք, որ հրդեհաշիջման աշխատանքների ընթացքում ծխահարվել են երեք հրշեջ-փրկարար. նրանցից մեկին տեղում ցուցաբերվել է բուժօգնություն, մյուս երկուսը տեղափոխվել են հիվանդանոց, այնուհետև անհրաժեշտ բուժօգնություն ստանալուց հետո վերադարձել դեպքի վայր:

Նախարարությունից հայտնում են, որ իրականացվում են նաև հրդեհին հարակից տարաների հովացման աշխատանքներ: Բացի այդ վստահեցնում են՝ գործարանի մոտակա տարածքից բնակիչների տարհանում կազմակերպելու անհրաժեշտություն չկա, քանի որ մարդկանց վտանգ չի սպառնում:

Ի դեպ, հավելենք, որ «Եվրոպա-Ասիա բիզնես ֆինանսական կենտրոն» հոլդինգի և կառավարության ներկայացուցիչների միջև վերջերս բանակցություններ էին ընթանում «Նաիրիտը»  վերագործարկելու շուրջ և առաջիկայում խոսք էր գնում գործարանում տեխնիկական աուդիտ անցկացնելու մասին:

Շողիկ Գալստյան