Արդյոք Տիգրան Ավինյանը վարձահատույց չի՞ եղել Ձեզ՝ իր ընտանիքին պատկանող ընկերությանը տված դրամաշնորհի համար․ Արման Բաբաջանյանը՝ Գեղամ Գևորգյանին․ ՏԵՍԱՆՅՈՒԹ

Ազգային ժողովի «Լուսավոր Հայաստան» խմբակցության պատգամավոր Արման Բաբաջանյանը խորհրդարան ներկայացած ՏՄՊՊՀ նախագահի թեկնածու Գեղամ Գևորգյանին ասաց, որ զարմացած է, թե ինչու է Նիկոլ Փաշինյանը հենց նրան առաջադրել այս  պաշտոնում։

«Փոխվարչապետ Տիգրան Ավինյանին պատկանող «Իրգեյթ» ընկերությունը նախորդ՝ 2018 թվականի մարտի 15-ին դիմել է Ձեր գլխավորած Գյուղատնտեսության զարգացման հիմնադրամին՝ դրամաշնորհ ստանալու հայտով, իսկ արդեն մայիսի 25-ին, երբ Ավինյանն արդեն փոխվարչապետ էր, Ձեր գլխավորած հիմնադրամը որոշում է կայացրել այդ ընկերությանը հատկացնել 37 մլն դրամ, որից 16 մլն դրամն անհատույց։ Ձեր գլխավորած հիմնադրամն, ըստ էության, փոխվարչապետին պատկանող ընկերության հետ վերջնական համաձայնագիր է կնքել 2018 թվականի օգոստոսի 1-ին, որից ընդամենը մի քանի ամիս անց՝ հոկտեմբերի 16-ին,  Դուք նշանակվել են գյուղատնտեսության նախարար։ Արդյոք Ձեզ Տիգրան Ավինյանը վարձահատույց չի՞ եղել՝ իր ընտանիքի արտադրության համար տրված դրամաշնորհի դիմաց»,-Գեղամ Գևորգյանից հետաքրքվեց պատգամավորը։

Ի պատասխան՝ Գևորգյանը նշեց, որ դրամաշնորհի տրամադրման որոշումը կայացվել էր մեկ այլ նախարարի օրոք, և հիմնադրամի տնօրենը զուտ ձևաբանական առումով հիմնադրամի անունից հրապարակել է փաստաթուղթ։

Գևորգյանը նաև հավելեց, որ տրամադրված ամբողջ դրամաշնորհի փաթեթը ստուգվել է բոլոր ներպետական և միջազգային չափանիշներով։

Մանրամասները՝ տեսանյութում։

Աղավնի Սուքիասյան