Անկախ նրանից՝ ով է շինարարական ընկերության տերը, եթե պատշաճ չի արվում գործը, չի վճարվում․ նախարար. ՏԵՍԱՆՅՈՒԹ

Նախորդ հինգ տարիների համեմատ՝ այս տարի ճանապարհաշինական աննախադեպ աշխատանքներ են իրականացվելու: Այսօր հրավիրված ասուլիսում տեղեկացրեց ՀՀ տրանսպորտի, կապի և տեղեկատվական տեխնոլոգիաների նախարար Հակոբ Արշակյանը:

Ըստ նախարարի՝ խոսքը ճանապարհների միջին նորոգման, հիմնանորոգման և լրացուցիչ հիմնանորոգման մասին է:

«Հաշվի առնելով նաև այն, որ արդար մրցույթների արդյունքում ունենալու ենք տնտեսումներ, դրանք նույնպես նույնպես ուղղվելու են ճանապարհաշինական ոլորտին»,- հավելեց նա: Նախարարի տեղեկացմամբ՝ նախատեսվում է նորոգել ավելի քան 300 կմ ճանապարհ, որից 78 կմ-ը՝ հիմնանորոգել: Այս ծրագիրը չի ներառում «Հյուսիս-Հարավն» ու Մ6՝ դեպի Վրաստանի սահման տանող ճանապարհահատվածը:

Հակոբ Արշակյանը, միաժամանակ, նշեց, որ հիմնական շեշտը դրվելու է Հայաստանը դեպի Վրաստան և Իրան տարանցիկ գոտի դարձնելու վրա. «Այս տարի այս ուղղությամբ 15 միլիարդից ավելի ճանապարհաշինության համար գումար ենք հատկացնելու»:

Ինչ վերաբերում է կատարվող աշխատանքների որակին, Արշակյանը նշեց, որ պետությանը մուծած հարկերի հաշվին ճանապարհաշինական աշխատանքները պետք է կատարվեն ամենաբարձր մակարդակով, և այս մեսիջները փոխանցվել են ճանապարհաշինական բոլոր ընկերություններին:

«Մենք մրցույթներն իրականացնում ենք բաց, թափանցիկ, և վերահսկողությունն իրականացնում ենք խիստ: Անկախ նրանից, թե ով է այս կամ այն շինարարական ընկերության տերը կամ տնօրենը, նախկին կամ ներկա պաշտոնյա է, թե ոչ, մենք իրականացնում ենք հսկողություն: Եթե գործը չի արվում պատշաճ որակի, տվյալ ընկերությունը չի վճարվում: Սա է ամբողջ տրամաբանությունը»,- ասաց Հակոբ Արշակյանը:

Մանրամասները՝ տեսանյութում: