Ինչո՞ւ Փաշինյանի խոստումը չի կատարվել․ կարող են մյուս խոստումներն էլ կասկածի տակ դրվել․ Էդմոն Մարուքյան. ՏԵՍԱՆՅՈՒԹ

Ազգային ժողովի պետա-իրավական հանձնաժողովում այսօր քննարկվում է  «Կառավարության կառուցվածքի և գործունեության մասին» Հայաստանի Հանրապետության օրենքում փոփոխություններ և լրացումներ կատարելու մասին» օրենքի նախագիծը:

Հարցի զեկուցող  «Քաղաքացիական պայմանագիր» կուսակցության վարչության անդամ Վահագն Հովակիմյանին ԱԺ ԼՀԿ խմբակցության ղեկավար Էդմոն Մարուքյանը հիշեցրեց, որ Փաշինյանը վարչապետ դառնալուց առաջ ԱԺ բարձր ամբիոնից պատասխանելով պատգամավորների հարցերին, ասել է, որ ԱԱԾ-ն և Ոստիկանությունը պետք է դառնան նախարարություններ։

«Մեկ տարի է սպասում ենք այս նախագծին, որ տեսնենք Կառավարության տեսլականը ու հիմա ուզում եմ իմանալ, ո՞րն է պատճառը, որ վարչապետի խոստումը չեք կատարում՝ որպես իշխող ուժի վարչության անդամ, արդյոք մի՞տք է փոխվել, եթե այո, որո՞նք են  այն նախադրյալները, որոնց ճնշման ներքո խոստումը չի կատարվում: Կարող են մյուս խոստումներն  էլ կասկածի տակ դրվել, խոստումը խոստում է»,- հարցադրումներ հնչեցրեց ԼՀԿ-ական պատգամավորը։

Հարցերին ի պատասխան Հովակիմյանը նշեց, որ Կառավարությունը  եկել է այն եզրահանգման, որ այս փուլում իրենց այս կառուցվածքն է պետք, իսկ թե  հաջորդ փուլում կլինի՞ նախաձեռնություն ուժային կառույցներին տալ նախարարության կարգավիճակ, չի կարող ասել։

«Այն մարդը, որը խոստում է տվել, Կառավարության ղեկավարն է․ հիմա ինչո՞ւ չի կատարել»,- չբավարարվելով Հովակիմյանի պատասխանից իր հարցը կրկնեց Էդմոն Մարուքյանը։

Մանրամասները՝ տեսանյութում։

Աղավնի Սուքիասյան