12 նախարարություն և հարյուրավոր կրճատված հաստիքներ. քննարկվում է Կառավարության կառուցվածքի փոփոխության հարցը. ՏԵՍԱՆՅՈՒԹ

Ազգային ժողովի պետաիրավական հարցերի մշտական հանձաժողովի ապրիլի 15-ի նիստում քննարկվում է «Կառավարության կառուցվածքի և գործունեության մասին» Հայաստանի Հանրապետության օրենքում փոփոխություններ և լրացումներ կատարելու մասին» օրենքի նախագիծը։ Հիմնական զեկուցող, արդարադատության նախարար Արտակ Զեյնալյանը նշեց, որ այս նախագծի հիմքում դրվել են Կառավարության գործունեության արդյունավետության բարձրացման անհրաժեշտությունն ու միջազգային փորձը։

Առաջարկվող փոփոխություններով՝ Կառավարությունը կազմված է լինելու վարչապետից, երկու փոխվարչապետներից և 12 նախարարից:

«Առաջարկվող փոփոխություններից հետո Կառավարության կառուցվածքում ընդգրկվելու են ՀՀ աշխատանքի և սոցիալական հարցերի, առողջապահության, արդարադատության, արտակարգ իրավիճակների, արտաքին գործերի, կրթության, գիտության, մշակույթի և սպորտի, շրջակա միջավայրի, պաշտպանության, տարածքային կառավարման և ենթակառուցվածքների, բարձր տեխնոլոգիաների արդյունաբերության, էկոնոմիկայի և ֆինանսների նախարարությունները։ Սփյուռքի նախարարությունը կմիավորվի վարչապետի աշխատակազմին, որտեղ կստեղծվի Սփյուռքի գործերի գլխավոր հանձնակատարի գրասենյակ: Միաժամանակ, վարչապետի աշխատակազմում կստեղծվի Սփյուռքի գործերի գլխավոր հանձնակատարի հայեցողական պաշտոնը, ով կիրականացնի վարչապետի՝ սփյուռքի հետ կապված քաղաքականության ապահովման և սփյուռքի հետ տարվող աշխատանքների միասնականության ապահովման լիազորությունների աշխատանքի կազմակերպումը»,- առաջարկվող փոփոխությունները ներկայացրեց նախարարը։

Նրա խոսքով՝ այս նախարարությունների կրճատումից հետո կկրճատվեն քաղաքական և հայեցողական պաշտոններ, նախարարների տեղակալների, խորհրդականների, խոսնակների հաստիքներ, ընդհանուր թիվը՝ մի քանի տասնյակ։

«Նախարարությունների միաձուլումից հետո կրկնվող ստորաբաժանումների քանակը կկրճատվի, որի ցուցանիշն էլ գնահատվում է մի քանի հարյուր»,- նշեց նախարարը։

Մանրամասները՝ տեսանյութում։

Աղավնի Սուքիասյան