Քաղաքականություն
10.04.2019 | 19:40Factor.am-ի զրուցակիցն է Ազգային ժողովի փոխնախագահ Ալեն Սիմոնյանը
– Պարոն Սիմոնյան, այսօր ԱԺ տնտեսական հարցերի մշտական հանձնաժողովում Ձեր հեղինակած՝ «Վիճակախաղերի մասին» ՀՀ օրենքում փոփոխություններ կատարելու մասին նախագծի քննարկումը հետաձգվեց, այն քննադատվեց նաև «Իմ քայլի» պատգամավորներից Հայկ Սարգսյանի կողմից, ի՞նչն է խնդիրը։
– Խնդիրն այն է, որ նախորդ գումարման Ազգային ժողովում Հանրապետական կուսակցությունն էր ամեն կերպ փորձում արգելքներ դնել նախագծի դեմ, իսկ այժմ պարոն Սարգսյանի կողմից թյուրըմբռնում կա, որ նոր է առնչվում այս օրենսդրական նախաձեռնության հետ։ Կարծում եմ՝ կան որոշ դրույթներ, որոնք լրացուցիչ պարզաբանման կարիք ունեն։ Նիստից հետո մենք ունեցանք փոքրիկ քննարկում և այն մտքերը, որոնք հնչեցին, կներառվեն նախագծում, իսկ հաջորդ նիստին մենք կունենանք կոնսենսուս։
– Ձեր նախագծին ընդդիմանալու հիմնական փաստարկն այն է, որ Ձեր առաջարկներով հարցը չի լուծվի։ Մտահոգություն չունե՞ք, որ նախագծի ընդունումը կտապալվի։
– Ի՞նչ է նշանակում, որ հարցը չի լուծվի, մենք կնվազեցնենք մարդկանց գայթակղությունը այդ ամենի մեջ ներքաշվելու, իսկ համացանցային տիրույթը կմտածենք, թե ինչ կարելի է անել։ Երևան քաղաքից և մյուս քաղաքներից այդ գայթակղությունը պետք է մաքսիմալ վերացնել։
– Տրանսգենդերի ելույթի շուրջ զարգացումները շարունակվում են, Հայաստանում Եվրոպական միության պատվիրակությունն ու Հայաստանում հավատարմագրված ԵՄ անդամ պետությունների դեսպանություններն են անդրադարձել հարցին, արձագանքել է նաև մեր ԱԳՆ-ն՝ նշելով, որ ՀՀ միջազգային գործընկերները պետք է ձեռնպահ մնան հասարակական քննարկումների անհարկի ուղղորդումից։ Դուք էլ եք կարծո՞ւմ, որ ուղղորդում կա։
– Ես ճիշտ չեմ համարում հավելյալ մեկնաբանություն տալ, որովհետև Արտաքին գործերի նախարարության մեկնաբանությունը շատ սպառիչ էր, իսկ բովանդակության առումով ներառում էր այն, ինչ ես կասեի։
– Վարչապետ Նիկոլ Փաշինյանը քայլին ինչպե՞ս եք վերաբերվում, դրոշի պատճառով մարդկանց ազատեց աշխատանքից։
– Եթե ուսադիր կրող մարդը կարող է այդպես անարգել դրոշը, ապա ես չեմ վստահի այդ մարդուն պետության հետ կապված որևիցե աշխատանք, դա վերաբերմունք է է պետության նկատմամբ։ Ես համարում եմ, որ մենք ավելի խիստ և կտրուկ քայլերի պետք է գնանք և առկա խնդիրներին ավելի արագ լուծումներ տանք։
Մանրամասները՝ տեսանյութում։
Շողիկ Գալստյան
