30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Նժդեհի արձանի վրա կրկին կրակել են. ո՞վ և ինչո՞ւ է վրեժ լուծում պետական գործչից
Հասարակություն
24.08.2017 | 18:43
Օրեր առաջ կրակել են Սյունիքի մարզի Խուստուփ լեռան մեծ գագաթի ստորոտում տեղադրված հայ պետական և ռազմական գործիչ Գարեգին Նժդեհի բրոնզաձույլ կիսանդրու վրա: Պարզվեց, որ առաջին անգամը չէ, երբ հայ պետական գործչի կիսանդրին նման հարձակման թիրախ է դառնում:
Ալպինիստ Վլադիմիր Բադալյանը Factor.am-ին պատմեց, որ Նժդեհի այս կիսանդրու վրա կրակել են նաև 2002-ին, 2004-ին և 2009-ին, ինչից հետո մեր զրուցակիցը փորձել է իր հնարավորության սահմաններում վերականգնել արձանը։ Այն, ի դեպ, ընդգրկված չէ պատմության և մշակույթի հուշարձանների ցանկում։
Նշենք, որ 2016 թվականին Վլադիմիր Բադալյանը դիմել է Մշակույթի նախարարություն՝ առաջարկելով Նժդեհի կիսանդրուն նորահայտ հուշարձանի կարգավիճակ տալ, սակայն ապարդյուն։
Մշակույթի նախարարության պատմության և մշակույթի գործակալության հուշարձանների և պատմական միջավայրի պահպանման բաժնի պետ Սուրեն Շաքարյանը Factor.am-ի հետ զրույցում շեշտեց, որ կիսանդրին իր գեղարվեստական արժանիքներով փորձագիտական հանձնաժողովի կողմից որպես պատմամշակութային արժեք չի գնահատվել։ Նրա խոսքով՝ արձանի նկատմամբ պատասխանատվությունն ընկնում է տեղական ինքնակառավարման մարմինների վրա։ Իսկ ահա մեր զրուցակիցը պնդում է որ տեղական ինքնակառավարման մարմինները ևս շահագրգռված չեն կիսանդրին վերականգնելու հարցում․ նա խոստանում է՝ եթե Սյունիքի մարզպետի կողմից արձագանք չլինի՝ դիմելու է նախագահին և ազգային անվտանգության ծառայությանը։
Վլադիմիր Բադալյանը համոզված է, որ Նժդեհի կիսանդրու ճակատագրով պետք է մտահոգվեն հատկապես «Հանրապետական» կուսակցության ներկայացուցիչները։ Ի դեպ, մենք կապ հաստատեցինք Հանրապետական կուսակցության մի քանի ներկայացուցիչների հետ, նրանցից ոչ ոք, սակայն, նշյալ դեպքից տեղյակ չէր։ Մասնավորապես` ՀՀԿ կազմակերպչական խորհրդի անդամ Ռուբեն Թադևոսյանը նախ նշեց, որ տեղյակ չէ և խնդրեց ավելի ուշ զանգահարել, ապա, արդեն տեղեկանալուց հետո, ասաց, որ ՀՀԿ-ից կարձագանքեն` հարկ եղած դեպքում: Ասել է թե` Հանրապետականների գաղափարական հոր` Նժդեհի կիսանդրու վրա պարբերական կրակոցները ՀՀԿ-ում առայժմ արձագանքի արժանի պատճառ չեն համարում:
Մանրամասները՝ Factor.am-ի տեսանյութում։
Աննա Բաբաջանյան
