Հայաստանի մանուկներն արժանի են ունենալ առողջ մանկություն. Աննա Հակոբյանը Բոստոնում մասնակցել է «Ժպիտների քաղաք» հիմնադրամի գալա-ընթրիքին

ՀՀ վարչապետի տիկնոջ պաշտոնական կայքից տեղեկանում ենք, որ  «City of smile ժպիտների քաղաք» բարեգործական հիմնադրամի հոգաբարձուների խորհրդի նախագահ Աննա Հակոբյանը, ԱՄՆ-ում ՀՀ  դեսպան Վարուժան Ներսեսյանի և «City of smile ժպիտների քաղաք» հիմնադրամի գործադիր տնօրեն Էսթեր Դեմիրճյանի ուղեկցությամբ ապրիլի 5-ի երեկոյան Բոստոնում ներկա է գտնվել «City of smile Ժպիտների քաղաք» հիմնադրամի նախաձեռնած բարեգործական գալա-ընթրիքին:

Միջոցառման մասնակիցների թիվը գերազանցել է 500-ը. նրանց թվում են՝ շերիֆ Փիթեր Քութուջյանը, Ամերիկայի հայկական համագումարի հոգաբարձուների խորհրդի համանախագահ Էնթոնի Բարսամյանը, հայտնի դիզայներ Մայքլ Արամը,  Մասաչուսեթսի նահանգային օրենսդիր մարմնի անդամ Դավիթ Մուրադյանը, Բոստոնում հայտնի այլ գործարարներ, բժշկներ, մտավորականներ և հասարակական գործիչներ:

Գալա-ընթրիքը մեկնարկել է ՀՀ և ԱՄՆ օրհներգերով և «Էրեբունի» անսամբլի պարային ներկայացումներով: Ելույթներով հանդես են եկել ԱՄՆ-ում ՀՀ դեսպան Վարուժան Ներսեսյանը, միջոցառման կազմակերպիչներ Սինտիա Ղազարյանն ու Արմինե Հովհաննիսյանը, «Ժպիտների քաղաք» բարեգործական հիմնադրամի գործադիր տնօրեն Էսթեր Դեմիրճյանը, մանկական ուռուցքաբան Գևորգ Թամամյանը: Հայր Վազգեն Կուզունյանն էլ սրբազան աղոթքով օրհնել է միջոցառումն ու բարի երթ մաղթել հիմնադրամի գործունեությանը:

Ընթրիքին ելույթով հանդես է եկել նաև միջոցառման պատվավոր հյուր Աննա Հակոբյանը:

Ողջունելով հյուրերին և միջոցառման կազմակերպիչներին, Աննա Հակոբյանը նշել է, որ երեկոն յուրահատուկ առաքելություն ունի՝ օգնել Հայաստանում քաղցկեղով հիվանդ երեխաներին։

«Ես երկար ճանապարհ եմ կտրել Բոստոնում այս միջոցառմանը գտնվելու և ձեր բոլորի աջակցությունը ստանալու համար։ Արել եմ դա՝ հավատալով, որ մենք միասին կարող ենք օգնել հայ մանուկներին հաղթահարել քաղցկեղը: Մեր մանուկներն ունեն դրա կարիքը և արժանի են ունենալ առողջ մանկություն։ Մեզ այսօր այստեղ միավորել է Հայաստանի մանուկներին խաղաղ, առողջ և երջանիկ մանկություն պարգեւելու առաքելությունը: Միասին մենք կարող ենք մեր երեխաներին ավելի առողջ և անհոգ մանկություն պարգևել: Հայաստանի մանուկներն արժանի են ունենալ առողջ մանկություն»,- ասել է  Աննա Հակոբյանը:

Գալա-ընթրիքին Մասաչուսեթսի նահանգային օրենսդիր մարմնի անդամ Դավիթ Մուրադյանը տիկին Հակոբյանին է փոխանցել Մասաչուսեթսի նահանգապետ Չարլզ Բեքերի ստորագրած փաստաթուղթը, որով նահանգային օրենսդիր մարմինը ճանաչում է, որ Աննա Հակոբյանի նախաձեռնած «Կանայք հանուն խաղաղության» արշավը, «Իմ քայլը» և «City of smile ժպիտների քաղաք» հիմնադրամները նպաստում են ժողովրդավարական արժեքների, մարդու իրավունքների և միջազգային խաղաղության խթանմանը: