17.01.2026 | 16:50
Երևանում վագոն-տնակ է այրվել
Այս տարի կսկսվի 31 դպրոցի վերանորոգում. Սուրեն Պապիկյան. ՏԵՍԱՆՅՈՒԹ
Հասարակություն
02.04.2019 | 13:27
Դպրոցների հետ կապված կան խնդիրներ, որոնք մեր առջև ծառացած են և որոնք ժառանգություն ենք ստացել: Հայաստանի գյուղերում կրթական հիմնախնդիրների թեմայով քննարկման ժամանակ այս մասին ասաց ՀՀ տարածքային կառավարման և զարգացման նախարար Սուրեն Պապիկյանը:
Քննարկման սկզբում ներկայացվեց Factor.am-ի «Կյանքը նոր Հայաստանի հին գյուղերում» նախագծի շրջանակում պատրաստված տեսանյութը: Արայիկ Պապիկյանն ասաց՝ ինքը տեսանյութը կվերնագրեր «Հին Հայաստանի ուրվականը»:
«Հին Հայաստանի ուրվականը շարունակում է մեզ հետապնդել, մեր առօրյայում է, քանի դեռ այն խնդիրները, որ մեր առաջ ծառացած են, լուծում չեն ստացել: Մենք համակարգված աշխատանքով, մեր գործընկեր գերատեսչությունների հետ միասին փորձում ենք վեր հանել բոլոր խնդիրները: Ձեզ էլ շնորհակալ ենք՝ խնդիրներն ավելի պատկերավոր ներկայացնելու համար»,- հավելեց նախարարը:
Սուրեն Պապիկյանը տեղեկացրեց, որ Ասիական զարգացման բանկի օգնությամբ Հայաստանում սեյսմիկ վտանգավորության հատվածում գտնվող դպրոցների վերակառուցման ծրագիր է իրականացվելու. «Նախնական նպատակը եղել է դրանց հիմնանորոգումը կամ նորոգումը, բայց ուսումնասիրությունները ցույց տվեցին, որ դպրոցների մեծ մասն ամբողջությամբ պետք է քանդել և նորից կառուցել»:
Ըստ նախարարի՝ սա է պատճառը, որ վերանորոգվող դպրոցների նախնական թիվը, գուցե, մի փոքր փոփոխվի: Այս պահին Կառավարության կողմից հաստատված է 46 դպրոցի հիմնանորոգման ծրագիր, որում կներառվի նաև Պտղունք համայնքի դպրոցը, որի վիճակին անդրադարձ կա Factor.am-ի նախագծում:
«Ես անձամբ եղել եմ Պտղունքում և այնտեղ, այո՛, հաստատել եմ, որ ծրագրում կընդգրկվի: Ուսումնասիրություններից հետո մենք հանգել ենք եզրակացության, որ անհրաժեշտ է այդ դպրոցը վերակառուցել: Այս տարի մենք նախատեսում ենք շուրջ 31 դպրոցի վերանորոգման աշխատանքների մեկնարկ: Ընթանում է 7 դպրոցի շինարարություն, որոնց մի մասն արդեն տարվա երկրորդ կեսին շահագործման կհանձնվի»,- ասաց Սուրեն Պապիկյանը:
Մանրամասները՝ տեսանյութում:
Ռոբերտ Անանյան
