Հրաման տվողը ես չեմ. Սամվել Օգանովսկին՝ իր հրաժարականի և նոր պաշտոնում նշանակվելու մասին

Արցախի Հանրապետության ՊԲ հրամանատարի տեղակալ, Արցախի հերոս Սամվել Կարապետյանը (Օգանովսկի) չի բացառում, որ առաջիկայում հրաժարական կտա նախարարի տեղակալի պաշտոնից: Այս մասին նա նշել է Factor.am-ի հետ զրույցում:

-Պարոն Կարապետյան, մամուլում տեղեկություններ կան, որ Դուք առաջիկայում հրաժարական եք տալու: Ճի՞շտ են այդ տեղեկությունները:

-Եթե հրաժարական տամ հրաման է լինելու:

-Լինելո՞ւ է նման հրաման:

-Չգիտեմ, հրաման տվողը ես չեմ:

-Հիմա այդ տեղեկությունները, որ ազատվելու եք որքանո՞վ են իրականությանը համապատասխանում:

-Ես գնալու եմ թոշակի, ինձ համար հանգստանամ: 30 տարի է ծառայում եմ:

-Ձեր աշխատանքից ազատվելը ինչ-որ կապ ունի՞ Հայաստանի իշխանությունների ցանկության հետ:

-Թոշակի եմ գնում, իշխանությունն ի՞նչ կապ ունի:

-Տեղեկություններ կան, որ Դուք հնարավոր է Լևոն Մնացականյանին փոխարինեք՝ Արցախի Արտակարգ իրավիճակների պետական ծառայության տնօրենի պաշտոնում:

– Չէ, հա:

-Հիմա՝ այո՞, թե՞ ոչ:

-Ոչ:

-Առաջիկայում Արցախում նախագահի ընտրություններ են, Դուք որևէ կերպ դերակատարություն ունենալո՞ւ եք այդ գործընթացին:

-Իհարկե՝ ոչ: Ես զինվորական եմ, զինվորական էլ մնալու եմ: Ես քաղաքականության հետ գործ չունեմ: Ես՝ որպես զինվորական, որպես Սամո, ոչ մի բանի չեմ խառնվելու:

-Պարոն Կարապետյան, Վահան Բադասյանը հայտարարում է, որ Դուք Արցախում ծեծ ու ջարդի քավորն եք, կրիմինալին եք հովանավորում: Այս տեղեկությունները ինչպե՞ս կմեկնաբանեք:

-Ես չեմ մեկնաբանում: Վահանն է էլի: Նա պետք է ինձ քննադատի՞, ազգն է որոշում՝ ես ճիշտ եմ, թե՝ սխալ: Վահանը ոչ մի բան էլ չի որոշում, ազգն է որոշում:

Նարեկ Կիրակոսյան