ԿԳՆ-ն պետք է ամեն ինչ անի՝ իրավիճակի կրկնությունը թույլ չտալու համար. Ավետիք Իշխանյանը՝ Ավշարի դպրոցի խնդրի մասին

Շատ կուզեի, որ հաշտության եզրեր գտնվեին, բայց դա, կարծես, անհնար էր: Factor.am-ի հետ զրույցում այս մասին ասաց Հայաստանի Հելսինկյան կոմիտեի նախագահ, իրավապաշտպան Ավետիք Իշխանյանը՝ անդրադառնալով Ավշարի դպրոցում լարված իրավիճակի և դրա արդյունքում կրթօջախի տնօրենի հրաժարականի խնդրին:

«Ես ինքս գնացել եմ Ավշար, փորձել տեղում ծանոթանալ իրավիճակին: Շատ լարված վիճակ էր, ցավով եմ ասում, որ հաշտության եզրեր, կարծես թե, չէին գտնվում: Իմ տպավորությունն այնպիսին էր, որ տնօրենը, ինչպես ինքն ասաց, զղջում է փոխտնօրենի հետ կապված խնդրի համար, որից էլ լարվածություն էր առաջացել: Հիմա կրքերը հանդարտվել են, տնօրենը հրաժարական է տվել: Հավանաբար՝ ճիշտ հանգուցալուծումը դա էր»,- հավելեց Ավետիք Իշխանյանը:

Նրա խոսքով՝ ստեղծված իրավիճակը պարզապես թյուրիմացության արդյունք էր:

«Շատ ցավում եմ տնօրենի՝Հերմինե Անդրեասյանի համար, իր հոգեկան վիճակի համար, որովհետև շատ դրական տպավորություն թողեց ինձ վրա: Ուղղակի թյուրիմացություն էր եղել: Հերմինե Անդրեասյանին մաղթում եմ հաջողություններ հետագա մասնագիտական գործունեության մեջ»,- ասաց իրավապաշտպանը:

Իսկ ԿԳ նախարարությանն ու մարզպետարաններին իրավապաշտպանը խորհուրդ է տալիս ամեն ինչ անել՝ այս իրավիճակի կրկնությունը թույլ չտալու համար: «Կրթության նախարարությունը, մարզպետարանների համապատասխան աշխատողներն այլևս չպետք է թույլ տան, որ որևէ դպրոցում այդպիսի լարվածություն առաջանա: Նկատի ունեմ ոչ թե ուժային՝ «կամ, կամ» սկզբունքի մեթոդով, այլ հաշտեցման ճանապարհով»,- նշեց Ավետիք Իշխանյանը:

Հիշեցնենք, որ Հերմինե Անդրեասյանն Ավշարի դպրոցի տնօրեն էր ընտրվել մարտի 1-ին՝ 7 կողմ, 1 ձեռնպահ ձայնով, և պաշտոնավարեց 25 օր։

Թ. Հակոբյան