Զբոսաշրջիկների թիվն ավելացել է, բյուջեն՝ կրճատվել. հայկական զբոսաշրջության առանձնահատկությունները

2017 թվականի առաջին կիսամյակի ընթացքում, ըստ Զբոսաշրջության պետական կոմիտեի, Հայաստան ներգնա զբոսաշրջային այցելությունների թիվն աճել է՝ կազմելով 6 22 հազար 381, ինչը 24.2 տոկոսով ավելի է նախորդ տարվա նույն ժամանակաշրջանի համեմատ:

Զբոսաշրջիկների թվի աճի մասին հուլիսի 27-ի Կառավարության նիստում հայտարարեց նաև վարչապետ Կարեն Կարապետյանը՝ միևնույն ժամանակ ընդգծելով, որ զբոսաշրջության ոլորտում առկա է լրացուցիչ խրախուսող և խթանող համալիր միջոցառումների անհրաժեշտություն:

ՀՀ Զբոսաշրջության պետական կոմիտեի նախագահի առաջին տեղակալ Մեխակ Ապրեսյանի կարծիքով՝ զբոսաշրջիկների թվի ավելացումը պայմանավորված է պետական և մասնավոր հատվածների ակտիվ, արդյունավետ համագործակցությամբ:

Տնտեսագետ Արտակ Մանուկյանը, մինչդեռ, «Զբոսաշրջություն. որակյա՞լ, թե՞ քանակական աճ» հոդվածում բարձրաձայնում է, որ զբոսաշրջիկների քանակական աճը դեռևս չի փաստում որակական աճի մասին: Տնտեսագետը նկատում է, որ օրինակ, զբոսաշրջիկների թվին զուգահեռ հյուրանոցներում հանգրվանողների թիվը չի աճում, հետևաբար այդ աճը չի բերում հարակից ենթակառուցվածքների զարգացմանը: Մանուկյանի ներկայացրած տվյալներով՝ 2016 թվականին Հայաստան ժամանած 1 միլիոն 260 հազար զբոսաշրջիկներից հյուրանոցներում հանգրվանել է ընդամենը 175 հազարը: Մեխակ Ապրեսյանն այս հանգամանքը բացատրում է նրանով, որ զբոսաշրջիկները նախընտրում են օրավարձով բնակարաններ:

Առավել մանրամասն՝ տեսանյութում:

Շողիկ Գալստյան