Քաղաքականություն
26.03.2019 | 19:43Factor.am-ի հարցազրույցը Լոռու մարզպետ Անդրեյ Ղուկասյանի հետ.
– Պարո՛ն Ղուկասյան, վերջերս Ձեր ֆեյսբուքյան էջում գրառում կատարեցիք՝ նշելով, որ ապրիլյան պատերազմում զոհվածների ընտանիքներին Ձեր մարզի նախորդ իշխանությունները տվել են 30.000 դրամ գումար, թեև նրանք ստորագրել են 50.000 դրամի դիմաց: Ձեր այս գրառմանը շտապեց պատասխանել նախկին մարզպետ Արթուր Նալբանդյանը և խորհուրդ տվեց իր անունը շահարկելով չինքնահաստատվել: Ինչո՞վ է պայմանավորված այս փոխադարձ հրաձգությունը:
– Մի քանի ճշտում մտցնեմ այս հարցում: Նախ՝ եղել է արցախյան պատերազմի մի մասնակցի ընտանիք, որին հատկացվել է 50.000 դրամ՝ ըստ փաստաթղթերի, սակայն իրականում հատկացվել է 30.000 դրամ մասնակցի մորը և կեղծվել է ստացողի ստորագրությունը: Քանի որ պարզ չի եղել, թե ո՞վ է այն աշխատակիցը, որը դա արել է, իմ գրառման մեջ որևէ անձնական բան կամ նախկին մարզպետին ուղղված որևէ մեղադրանք ես չեմ հնչեցրել: Նախորդ մարզպետի պատասխանին չեմ անդրադառնա: Ասեմ նաև, որ ոչ միայն այդ դեպքով, այլև մարզպետարանի նախկին գործունեության հետ կապված կան բազմաթիվ՝ արդեն իսկ հարուցված քրեական գործեր, և մոտ ապագայում կլինեն նորերը, ես ուղղակի վստահ եմ, քանի որ մարզպետարանը եղել է բավականին կոռումպացված կառույցներից մեկը:
– Ինչպե՞ս է դրսևորվել այդ կոռուպցիան:
– Աշխատանքի են ընդունվել կաշառքով՝ և՛ դպրոցներում, և՛ բուժհիմնարկներում, իհարկե՝ ոչ բոլոր դեպքերում: Մարզպետարանի գործառույթների մի մասն իրականացրել են կաշառքով: Դա բոլորին հայտնի է, ցանկացած լոռեցու եթե հարցնեք, կհաստատի: Հիմա իրավապահ մարմինները կզբաղվեն դրանցով: Երբ որոշակի փաստեր լինում են իմ ձեռքի տակ, ես դիմում եմ իրավապահ մարմիններին՝ սահմանված կարգով այդ ամենը հետազոտելու, ուսումնասիրելու, և եթե կարիք կա, քրեական գործ հարուցելու համար: Ես՝ որպես մարզպետ, ունեմ պարտավորվածություն մեր մարզի տարածքում նախ բացառել այդ կոռուպցիոն դրսևորումները, բացի այդ՝ պատասխանատու եմ նաև օգնել, որ նախկինում կատարված հանցագործությունները բացահայտվեն:
– Վարչապետ Նիկոլ Փաշինյանը հայտարարել է տնտեսական հեղափոխության մասին: Ձեր մարզում այդ հեղափոխությունն ի՞նչ քայլերով եք իրականացնելու:
– Երևի տեղյակ եք «Իմ քայլը՝ հանուն Լոռու մարզի» բիզնես-ֆորումի մասին: Ես հայտարարել եմ, որ դրանով տնտեսական հեղափոխության մեկնարկն է տրվում: Մինչ այդ և դրանից հետո էլ մենք գործարարների հետ ակտիվ համագործակցում ենք, փորձում ենք օգտակար լինել, եթե արհեստական խոչընդոտներ են լինում, փորձում ենք դրանք անմիջապես վերացնել: Մեր մոտեցումն է՝ ստեղծել բարենպաստ պայմաններ: Հատուկ ինչ-որ գործողություն չենք պատրաստվում անել, այլ ստեղծել բարենպաստ պայմաններ, իսկ այն ընկերություններին, որոնց ներդրումների չափը կլինի զգալի, մենք կտրամադրենք նաև արտոնություններ:
– Իսկ որո՞նք են մարզի զարգացման առաջնահերթությունները:
– Տուրիզմի, թեթև արդյունաբերության, գյուղատնտեսության և տեղեկատվական տեխնոլոգիաների ոլորտներն են, որ մեր մարզում համարվում են գերակա և պոտենցիալ ունեցող ճյուղեր:
– Լոռու մարզպետարանում օպտիմալացում սպասվո՞ւմ է: Մարզպետարանում քանի՞ աշխատակից կա, և օպտիմալացման արդյունքում քանի՞սը կպահպանեն աշխատատեղը:
– Այս պահի դրությամբ ունենք 138 հաստիք: Չեմ կարող ասել, թե օպտիմալացման արդյունքում քանի՞ հաստիք ստիպված կլինենք կրճատել: Խոսքը մոտավորապես 20-30 տոկոսի մասին է, և կրճատումները տեղի կունենան միայն մի սկզբունքի հիման վրա՝ հաշվի կառնվի աշխատակիցների պրոֆեսիոնալիզմը: Մեզ համար կարևոր է ունենալ փոքր անձնակազմ, բայց ավելի մոտիվացված, ավելի բարձր վարձատրվող, ավելի նպատակասլաց և պրոֆեսիոնալ:
– Կադրային քաղաքականություն իրականացնելիս կուսակցական պատկանելությունը կարևորելո՞ւ եք, թե՞ Ձեզ հետ կարող են աշխատել նաև ՀՀԿ-ականները կամ նրանց օրոք մարզպետարանում աշխատածները:
– Անկեղծ ասեմ՝ չգիտեմ, թե մարզպետարանի աշխատակիցներից ով ինչ կուսակցության անդամ է և ինչ կուսակցության է հարում: Գիտեք, որ կան մի քանի պաշտոններ, որոնք քաղաքական են, օրինակ՝ մարզպետինն ու տեղակալներինը: Մնացածն ինձ ուղղակի չի հետաքրքրում, թե ով որ կուսակցության անդամ է:
Հարցազրույցն ամբողջությամբ՝ տեսանյութում:
Աղավնի Սուքիասյան
