«Հեղափոխության մասին պատմության դասագրքերում անպայման է նշվելու». «Իմ քայլի» պատգամավորները՝ Քաղաքացու օրը տոնելու մասին. ՏԵՍԱՆՅՈՒԹ

Քաղաքացիներն իրենք են ձևավորելու օրվա խորհուրդը: Factor.am-ի հարցին, թե ինչպե՞ս պետք է տոնել Քաղաքացու օրը, պատասխանեց «Իմ քայլը» խմբակցության պատգամավոր Հրաչյա Հակոբյանը:

«Իմ քայլը» խմբակցությունից Կարեն Սարուխանյանն էլ նշեց, որ պետք է քաղաքացիներից հարցնել, թե ինչպես պետք է այդ օրը նշել. «Իմ համար ամեն օր է քաղաքացու օր: Իմ կարծիքով ինչ-որ հատուկ բան չի լինի»:

Պատգամավոր Հայկ Սարգսյանն այն կարծիքին է, որ մարդկանց մոտ անորոշություն չկա, թե ինչպես պետք է նշել Քաղաքացու օրը: Նա հիշեցնում է անցած տարվա ապրիլի 23-ը, երբ Սերժ Սարգսյանը հրաժարական տվեց։ Այդ օրը, պատգամավորի դիտարկմամբ, հենց Քաղաքացու տոն էր. «Անցած տարի էլ հայտարարված չէր, թե ինչպես պետք է նշել, ամեն մարդ ինչպես ցանկացավ, նշեց: Մեկը հրապարակում նշեց, մյուսը՝ փողոց փակելով, խորոված անելով: Տոնի սահմանված ձևաչափ չկա, ոմանք շամպայն են խմել, ոմանք ալկոհոլ չեն օգտագործել: Նույնը տեղի է ունենալու այս տարի, բացի Նոր տարուց մյուս տոների համար սահմանված ձև չկա»:

«Իմ քայլը» խմբակցությունից Կարեն Համբարձությանը ևս չգիտի, թե Քաղաքացու օրը ինչպես պետք է նշվի. «Օրը կգա, կորոշենք, թե ինչպես պետք է նշվի: Առաջին անգամ է լինելու, բոլորս համատեղ կտեսնենք, թե ինչպես ենք տոնելու: Եթե այն քաղաքացու տոնն է՝ կարող ենք նաև խորոված ուտել, քեֆ անել»:

Factor.am-ի հարցին՝ պե՞տք է հեղափոխության մասին պատմության դասագրքերում նշել, Կարեն Համբարձումյանը պատասխանեց. «Իհարկե, ինչո՞ւ ոչ, բա դա պատմություն է, իհարկե պետք է նշվի»:

«Իմ քայլը» խմբակցությունից Գևորգ Պապոյանն էլ, մեկնաբանելով վարչապետի այն խոսքերը, որ հեղափոխությանը չմասնակցածները պետք է գնան խաշ ուտելու, ասաց. «Քաղաքացիների մի հատված կա, որոնք ծաղրում են Քաղաքացու օրը, խոսքն այդ մասին է»:

Պատգամավոր Թագուհի Ղազարյանն էլ նշեց, որ ինքը կամ այլ պատգամավոր չէ, որ պետք է թելադրեն, թե քաղաքացին ինչպես նշի իր տոնը: «Ես չգիտեմ, թե Սեպտեմբերի 21-ը կամ Մարտի 8-ն առաջին անգամ ինչպես է նշվել: Դա ընթացքում է պարզ լինելու»:

Մանրամասները՝ տեսանյութում:

Նարեկ Կիրակոսյան