Հասարակություն
25.03.2019 | 15:00
ՀՀ բնապահպանության նախարարության կենսաբազմազանության և կենսաանվտանգության քաղաքականության բաժնի պետ Ոսկեհատ Գրիգորյանն այսօր հրավիրված մամուլի ասուլիսի ժամանակ, ներկայացնելով «Հայաստանում 2019-թվականը Կովկասյան ընձառյուծի տարի» հռչակելուն և կովկասյան ընձառյուծի պահպանության ծրագրի վերաբերյալ մանրամասներին, նշեց, որ այդ ուղղությամբ միջոցառումներ են անցկացվելու ամբողջ տարվա ընթացքում:
«Գիտաժողովներ, ցուցահանդեսներ, տեղեկատվական արշավներ. կովկասյան ընձառյուծի տարվա ծրագրի շրջանակում նախատեսված են բազմաթիվ միջոցառումներ»,- ասաց Գրիգորյանը՝ նշելով, որ նպատակ ունեն տարբեր միջոցառումների միջոցով հասարակության լայն շերտերի մոտ բարձրացնել բնապահպանական հարցերի շուրջ իրազեկվածության մակարդակը և ընդգծել ընձառյուծի՝ էկոհամակարգում ունեցած դերը։
Ըստ Ոսկեհատ Գրիգորյանի՝ ծրագրերն իրականացվելու են երկու խմբով:
«Առաջին խումբ միջոցառումները միտված են ընդգրկելու հասարակության լայն շերտերին: Նախատեսված է տեսահոլովակների թողարկում, կայք էջի բացում, ցուցահանդեսների կազմակերպում: Դպրոցականների համար կկազմակերպվեն դասընթացներ։ Ծրագրված է պատկերազարդ գրքի թողարկում: Միջոցառումների մյուս խումբն ընդգրկելու է միջազգային կառույցների, գիտնականների մասնակցություն: Լոռու մարզի Դեբետ համայնքում հոկտեմբերին կայանալու է գիտաժողով, որին մասնակցելու են մի շարք երկրների բարձրաստիճան պաշտոնյաներ, բնապահպանական հացերով զբաղվող միջազգային կազմակերպությունների ներկայացուցիչներ»,- ասաց նա։
Ասուլիսին մասնակից «Բնության համաշխարհային հիմնադրամի» (WWF) հայաստանյան մասնաճյուղի տնօրեն Կարեն Մանվելյանն էլ նշեց, որ 2002 թվականին հիմնադրամը Բնապահպանության նախարարության հետ իրականացնում է ընձառյուծի պահպանման ծրագիրը:
«Երբ նոր էինք սկսում, այն ժամանակ Հայաստանում մեկ, երկու ընձառյուծ էր լինում, այսօր մոտ 9-10 առանձնյակ կա: Սա բոլոր այն գործընկերների հաջողությունն է, որոնք ներգրավված են եղել այս աշխատանքներում: Դրանում իր ազդեցությունն ունեցավ հատուկ պահպանվող տարածքների հզորացումը, նորերի ստեղծումը, այսօր մեծ գործ է անում բնապահպանական տեսչությունը»,- ասաց նա։
Աղավնի Սուքիասյան
