17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
Մանվել Գրիգորյանը քաղաքացիական հիվանդանոց է տեղափոխվել․ Լևոն Բաղդասարյան
Հասարակություն
25.03.2019 | 15:33
ԱԺ նախկին պատգամավոր, գեներալ Մանվել Գրիգորյանին ժամեր առաջ տեղափոխել են քաղաքացիական հիվանդանոց։
Այս մասին Factor.am-ի հետ զրույցում ասաց Գրիգորյանի պաշտպան Լևոն Բաղդասարյանը։
«Մանվել Գրիգորյանը տեղափոխվել է քաղաքացիական հիվանդանոց․ թե որ հիվանդանոցում է, այս պահին ասել չեմ կարող, միայն նշեմ, որ ՄԻԵԴ-ը ՀՀ Կառավարությանը մինչև ապրիլ ամիսը ժամկետ էր հատկացրել Գրիգորյանի առողջության վերաբերյալ ամբողջական տվյալներ ներկայացնելու համար։ Այդ նպատակով էլ Գրիգորյանին տեղափոխել են քաղաքացիական հիվանդանոց՝ համապատասխան զննություններ իրականացնելու համար»,- մանրամասնեց պաշտպանը։
Հիշեցնենք, որ 2019 թվականի մարտի 22-ին Մարդու իրավունքների եվրոպական դատարանից ստացված գրությամբ ՀՀ կառավարությունը տեղեկացվել է, որ 2019 թվականի մարտի 12-ին Մանվել Գրիգորյանի փաստաբանը, դիմելով Եվրոպական դատարան, խնդրել է, որ վերջինս, Դատարանի կանոնակարգի 39-րդ կանոնի համաձայն, միջանկյալ միջոց ձեռնարկի` պարտավորեցնելով ՀՀ իշխանություններին Մանվել Գրիգորյանին անհապաղ տեղափոխել քաղաքացիական հիվանդանոց՝ համապատասխան բժիշկ մասնագետների հսկողության տակ, ինչպես նաև վերջինիս անհապաղ տեղափոխել Ֆրանսիայի Հանրապետությունում գտնվող իր կողմից մատնանշված բուժհաստատություն՝ հետագա ստուգման և բուժման նպատակով:
Ավելի վաղ էլ ՀՔԾ տեղեկացրել էր, որ Մանվել Գրիգորյանի մոտ չի հայտնաբերվել որևէ հիվանդություն, որը դասվում է պատիժը կրելուն խոչընդոտող հիվանդությունների շարքին:
