Շաքարավազ, բանան, բենզին ներկրող խոշոր ընկերությունների տեսակարար կշիռը փոխվել է. մրցակցային պայմաններ են փոխվել․ ՏԵՍԱՆՅՈՒԹ

Ազգային ժողովի տնտեսական հարցերի մշտական հանձնաժողովում այսօր քննարկվում է Կառավարության 2018 թվականի հունիսի 1-ի որոշմամբ հավանության արժանացած «Կառավարության ծրագրի կատարման ընթացքի և արդյունքների մասին» զեկույցը։

Հարցը զեկուցող, ՀՀ տնտեսական զարգացման և ներդրումների նախարար Տիգրան Խաչատրյանն իր ելույթի առաջին հատվածում առանձնացրեց տնտեսական զարգացմանն ուղղված մի շարք քայլեր՝ նշելով, որ դրանք նպատակ ունեն գործարար միջավայրը կառուցել այնպես, որ ներդրողներն իրենց ժամանակի մեծ մասը ծախսեն ներդրումային ծրագրերը զարգացնելու ուղղությամբ և խոչընդոտների չհանդիպեն։

Ըստ նախարարի՝ տնտեսական քաղաքականության նպատակն է շուկան դարձնել ազատական, իսկ ներդրումային միջավայրը՝ այնպիսին, որ պետական ներդրումների պարագայում ունենանք բարձր շահութաբերություն։

Խոսելով շուկայի ազատականացման մասին՝ Տիգրան Խաչատրյանը կարևորեց մի շարք ոլորտներում արձանագրված ցուցանիշները. «Եթե մենք խոսում ենք շուկաների ազատականացման մասին, ապա պետք է ասեմ, որ 2018 թվականի վերջին շաքարավազ ներմուծող խոշոր ընկերության տեսակարար կշիռը կազմել է 78 տոկոս՝ նախկին 95 տոկոսի փոխարեն, բանան ներմուծող խոշոր ընկերության տեսակարար կշիռը կազմել է 30 տոկոս՝ նախկին 57-ի փոխարեն, բենզին ներկողինը՝ 29 տոկոս՝ նախկին 49-ի փոխարեն»:

Նախարարն առանձնացրեց նաև ստվերի դեմ տարվող պայքարի արդյունքում հայտարարագրված աշխատատեղերի քանակը՝ նշելով, որ 2018 թվականին հայտարարագրվել է ավելի քան 37 հազար աշխատատեղ։

Մանրամասները՝ տեսանյութում։

Աղավնի Սուքիասյան