Հասարակություն
20.03.2019 | 14:59
«Երազ» բարեգործական հիմնադրամը «Մուրացան» համալսարանական հիվանդանոցի էնդոկրինոլոգիական կլինիկայի հետ համատեղ իրականացնում է «Ունեմ դիաբետ, չունեմ խնդիր» խորագրով ծրագիրը, որի նպատակն է աջակցել դիաբետ ունեցող երեխաներին։
Այսօր հրավիրված մամուլի ասուլիսի ժամանակ, անդրադառնալով 2018 թվականի ապրիլի 1-ից գործող ծրագրին ու դրա արդյունքներին՝ ՀՀ ԱՆ գլխավոր մանկական էնդոկրինոլոգ, «Մուրացան» համալսարանական հիվանդանոցի էնդոկրինոլոգիական կլինիկայի ղեկավար Ելենա Աղաջանովան նշեց, որ երեխաների մոտ ախտորոշված շաքարային դիաբետը երեխայի և նրա ընտանիքի անդամների համար լուրջ խնդիրներ է առաջացնում, կա դիաբետի հետ ապրելու խնդիր, իսկ դրա համար անհրաժեշտ են համապատասխան գիտելիքներ։
«Դիաբետ ունեցող երեխաները խնդիրների էին հանդիպում նաև դպրոցում և մանկապատեզում, քանի որ լինում էին ուսուցիչներ և դաստիարակներ, որոնք չունենալով համապատասխան գիտելիքներ վախենում էին շփվել նման խնդիրներ ունեցող երեխաների հետ։ Այդ բացը լրացնելու համար իրականացրինք «Ունեմ դիաբետ, չունեմ խնդիր» խորագրով ծրագիրը, որպեսզի ուսուցիչներն ու դաստիարակները չվախենան շփվել դիաբետով երեխաների հետ։ Մեր կողմից իրականացվող ծրագրի մեջ ընդգրկված են և՛ իրավաբաններ, և՛ բժիշկներ»,- ասաց Աղաջանովան՝ հիշեցնելով, որ դիաբետ ունեցող երեխաների համար իրականացրել են ծրագրեր նաև ավագ դպրոցներում, դրանք լինելու են շարունակական, քանի որ գնալով ավելանում է դիաբետով հիվանդ երեխաների թիվը։
Ասուլիսին մասնակից «Ունեմ դիաբետ, չունեմ խնդիր» ծրագրի ղեկավար Կարինե Մխիթարյանն էլ նշեց, որ ծրագրի շարունակականության ապահովման համար անհրաժեշտ է ֆինանսավորում։
«Մենք պատրաստ ենք մեր ռեսուրսներն ու ներուժը ներդնել։ Մենք այս ծրագրով նաև ոչ միայն առողջապահական խնդիր ենք լուծում, այլ նաև սոցիալական, օրինակ Կոտայքի և Սյունիքի մարզում իրացրել ենք շաքարային դիաբետ ունեցող երեխաների կրթական իրավունքը»,- ասաց Մխիթարյանը՝ հավելելով, որ այս ծրագրի շրջանակներում լուծվել են նաև երեխաներին տրվող հաշմանդամության կարգի հետ կապված որոշ խնդիրներ։
Աղավնի Սուքիասյան
