Կառավարություն գնալու և այսօր դպրոցի մուտքը փակելու իմաստը չեմ հասկանում․ Արմավիրի մարզպետը՝ Լենուղիում ստեղծված լարված իրավիճակի մասին

Վաղ առավոտից լարված իրավիճակ է Արմավիրի մարզի Լենուղի համայնքում․ ժամը 08։00-ից դպրոցի մուտքը փակել են համայնքի 4-րդ կարգի վթարային շենքի 20-ից ավելի  բնակիչներ և արգելել ուսուցիչներին և աշակերտներին մուտք գործել դպրոց։ Նրանցից յուրաքանչյուրը պահանջում է իրեն տրամադրել 6-7 մլն դրամ գումար, որպեսզի կարողանան նոր բնակարան ձեռք բերեն։

Դպրոցի մուտքը բացվեց միայն ոստիկանական գործողությունների արդյունքում և չնայած դրան՝ բնակիչները շարունակում են պնդել, որ բողոքի նմանատիպ ակցիաները կրկին կիրականացնեն, քանի դեռ իրենց խնդրին լուծում տրված չէ։

Factor.am-ի հետ զրույցում Արմավիրի մարզպետ Համբարձում Մաթևոսյանը նշեց, որ այսօր պատրաստվում է ընդունել բողոքի ակցիա իրականացրած բնակիչներին և լսել նրանց:

«Նման հանդիպումներ թեև էլի են եղել, նրանց առաջարկվել են լուծումներ․ օրինակ առաջարկել ենք վթարային շենքից դուրս գալ և տեղափոխվել ամբուլատորիայի շենք կամ այլ շինություն, մինչև կարողանանք  խնդիրը լուծել, սակայն հրաժարվել են։ Ուրբաթ օրը գնացել էին Կառավարություն, երկուշաբթի օրը՝ դպրոց են փակել: Ես պարզապես դրա իմաստը չեմ հասկանում․ չէ՞ որ խոսքը գնում է յուրաքանչյուրի համար 6-7 մլն դրամ հատկացնելու մասին, իսկ մարզպետարանը նման բյուջե չունի»,-ասաց Մաթևոսյանը՝ նշելով, որ այսօր բողոքի ակցիա իրականացրած բնակիչների հետ փորձելու է գտնել լուծման եզրեր՝ կանխելու համար վաղը նրանց կողմից կրկին դպրոցի մուտքը փակելու և դասապրոցեսը խաթարելու հնարավոր փորձերը։

Բողոքի ակցիա իրականացրած բնակիչների և մարզպետի հանդիպման մանրամասներն՝ ավելի ուշ։

Աղավնի Սուքիասյան