«Սանիթեքի» ղեկավարը տեղյակ չէ իր աշխատակիցների մասնակցությամբ ծեծի մասին, ինչից հետո քաղաքացին մահացել է

«Սանիթեք» ընկերության գործառնական ղեկավար Արգիշտի Տիգրանյանը չի մեկնաբանում «Սանիթեքի» աշխատակիցների մասնակցությամբ միջադեպը: Factor.am-ի հարցին ի պատասխան՝ Արգիշտի Տիգրանյանը հայտարարեց. «Ես իրավասու չեմ պարզաբանում տալ, ես այդ միջադեպից տեղյակ չեմ»:

Նշենք, որ օգոստոսի 15-ին Շենգավիթ վարչական շրջանում գտնվող Կարմիր Բլուր կոչվող գերեզմանատան մուտքի մոտ վիճաբանություն և ծեծկռտուք է տեղի ունեցել «Սանիթեքի» աշխատակիցների ու տեղի բնակիչների՝ 59-ամյա մի տղամարդու և նրա որդու միջև: Վիճաբանությունն սկսվել է աղբատար մեքենայի լվացման պատճառով և ավարտվել է ծեծկռտուքով, ինչից հետո 59-ամյա տղամարդը մահացել է, իսկ նրա որդին ստացել է մարմնական վնասվածքներ:

ՀՀ քննչական կոմիտեի մամուլի խոսնակ Սոնա Տռուզյանը մեզ հետ զրույցում հաստատեց, որ օգոստոսի 15-ին՝ ժ.20:40-ին Սուրբ Աստվածամայր Բ/Կ-ից հաղորդում է ստացվել, որ իրենց մոտ է տեղափոխվել 1958 թ. ծնված տղամարդու դի։ Արտաքին զննությամբ դիակի վրա հայտնաբերվել են արյունազեղումներ:

«Ձեռնարկված միջոցառումների արդյունքում պարզվել է, որ 2017թ. օգոստոսի 15-ին` ժամը 20:10-ի սահմաններում, Կարմիր Բլուր կոչվող գերեզմանատան մուտքի մոտ տեղի է ունեցել վիճաբանություն, որի ընթացքում ձեռքերով հարվածներ են հասցրել 1958 թ. ծնված տղամարդուն և նրա որդուն։ Վիճաբանությունից հետո 59-ամյա տղամարդը մահացել է։ Նշանակվել է դատաբժշկական փորձաքննություն տղամարդու մահվան պատճառը պարզելու համար։ Եզրակացությունը դեռ չի ստացվել։ Փորձագետների կողմից վարույթն իրականացնող մարմնին տրամադրված նախնական տվյալների համաձայն՝ տղամարդը մահացել է բավարար արտահայտված գեներալիզացված /համատարածուն/ աթերոսկլերոզի հետևանքով: Որդուն պատճառված վնասվածքները գնահատվել են թեթև վնասի հատկանիշներ չպարունակող մարմնական վնասվածքներ»,- հավելեց Տռուզյանը:

Փաստի առթիվ ՀՀ ՔԿ ԵՔՔՎ Շենգավիթ վարչական շրջանի քննչական բաժնում հարուցվել է քրեական գործ ՀՀ քրեական օրենսգրքի 118-րդ հոդվածով և կատարվում են անհրաժեշտ քննչական գործողություններ՝ դեպքի բոլոր հանգամանքների բազմակողմանի, օբյեկտիվ և լրիվ հետազոտումն ապահովելու ուղղությամբ, 59-ամյա քաղաքացին և նրա որդին ճանաչվել են տուժող։ Նշանակվել են փորձաքննություններ, հարցաքննվել ականատես անձինք։ Քննությամբ հստակեցվում են վիճաբանությանը մասնակից անձանց շրջանակը, անհատականացվում նրանցից յուրաքանչյուրի գործողությունները։ Մեկ անձի նկատմամբ՝ որպես կասկածյալի, խափանման միջոց է ընտրվել ստորագրություն չհեռանալու մասին:

Շողիկ Գալստյան