Կար բանավոր մեղադրանք, որ ես պայմանավորվել եմ իշխանությունների հետ՝ ռեկտոր դառնալու համար․ ԵՊՀ պրոռեկտոր Գեղամ Գևորգյանն՝ իր ազատման հրամանի մասին

ԵՊՀ պրոռեկտոր Գեղամ Գևորգյանը ռեկտոր Արամ Սիմոնյանի հրամանով ազատվել է աշխատանքից։

Գևորգյանն ազատվել է իր նկատմամբ անվստահություն հայտնելու հիմքով։

Factor.am-ի հետ զրույցում աշխատանքից ազատված Գեղամ Գևորգյանն ասաց, որ աշխատանքային հարաբերությունները կարգավորվում են Աշխատանքային օրենսգրքով, իսկ իր ազատման հրամանում Աշխատանքային օրենսգրքին որևէ հղում չկա:

«Կան ինչ-որ անհասկանալի հղումներ ՄԻԵԴ-ի որոշումներին, ասվում է, որ իբրև թե վերացել է վստահությունը պրոռեկտորի և ռեկտորի միջև, բայց չկա նշված, թե ո՞ր պրոռեկտորի»,- նշեց Գևորգյանը։

Վերջինիս խոսքով՝ Աշխատանքային օրենսգրքի 122 հոդվածով հստակ սահմանված են անվստահություն հայտնելու դեպքերը․«Սահմանված երեք հոդվածներն են՝ նյութական չարաշահումներ, նյութականի համար պատասխանատու չեմ, մանկավարժական գործողությունների ժամանակ անհարիր արարք թույլ տալը, որը դժվար է ինձ կպցնել, և երրորդը՝ կոմերցիոն գաղտնիք հրապարակելը։ Իսկ ԵՊՀ-ում ամեն ինչ բաց է․ ճանճը տզզում է՝ համացանցում դնում են՝ բացառությամբ այս հրամանի։ Այնպես որ, այդ երեք հոդվածներից որևէ մեկի տակ ինձ խցկելն անհնար է»։

Հարցին՝ արդյոք ցանկություն ունեցել է ԵՊՀ ռեկտոր դառնալու, ինչպես ավելի վաղ գրել էր մամուլը, Գեղամ Գևորգյանն արձագանքեց․ «Եթե նույնիսկ ենթադրենք, որ ես ուզում եմ կամ աշխատում եմ դրա համար, որևէ պախարակելի բան կա՞ դրանում»։

Ճշտող հարցին՝ կապ տեսնո՞ւմ է մամուլում շրջանառված լուրի և իր աշխատանքից ազատման հրամանի միջև, Գևորգյանը պատասխանեց․«Իհարկե՛, այո, նախ ասեմ, որ այդ գրված հոդվածն ինձ թվում է, որ պատվիրված էր։ Մյուս կողմից, կար բանավոր մեղադրանք, որ ես պայմանավորվել եմ իշխանությունների հետ ռեկտոր դառնալու համար։ Տրվել են մարդկանց անուններ, որոնց մեջ կային ինձ համար անծանոթ մարդիկ կամ նաև այնպիսիք, որոնց վեց ամիս է չեմ տեսել»:

Գեղամ Գևորգյանը նշեց, որ պատրաստվում է իր ազատման հրամանը վիճարկել դատարանում։

Գեղամ Գևորգյանի ազատման հրամանը՝ ստորև

Աղավնի Սուքիասյան