09.06.2026 | 23:19
Կանանց Հայաստանի հավաքականը 0:6 հաշվով պարտվեց Բելառուսին. ՏԵՍԱՆՅՈՒԹ
Դասադուլ Երևանի թիվ 2 պետական քոլեջում. ուսանողները պահանջում են աշխատանքից հեռացված տնօրենի վերադարձը
Հասարակություն
15.03.2019 | 17:26
Երևանի Նորայր Աճեմյանի անվան տարածաշրջանային թիվ 2 պետական քոլեջում այսօր դասադուլ էր: Ուսանողները պահանջում են պաշտոնին վերականգնել աշխատանքից հեռացված տնօրեն Կառլեն Հայրապետյանին:
Քոլեջի Ուսխորհրդի նախագահ Մարիամ Գյուրջյանը Factor.am-ի հետ զրույցում նշեց, որ նախօրեին Կառավարության շենքի առջև բողոքի ակցիայի ընթացքում նախնական և միջին մասնագիտական կրթության վարչություն պետ Արտակ Աղբալյանը խոստացել էր, որ ակցիայի մասնակցիներին կհանդիպի կրթության և գիտության նախարարը, բայց նա այսօր քոլեջ չի գնացել: Փոխարենը հանդիպման են գնացել Արտակ Աղբալյանն ու փոխնախարար Գրիշա Թամրազյանը:
Նրանք հանդիպել և զրուցել են քոլեջի դասախոսական կազմի հետ՝ հորդորելով դադարեցնել ուսանողների դասադուլը:
Մարիամ Գյուրջյանի խոսքով, սակայն, շարունակելու են դասադուլն այնքան, մինչև Կառլեն Հայրապետյանն աշխատանքի վերադառնա:
«Ընդամենը մեկ տարի պաշտոնավարած մարդուն երկու խիստ նկատողության հիման վրա աշխատանքից հեռացնելը մեզ համար անընդունելի է»,- ասաց Մարիամ Գյուրջյանը:
Հիշեցնենք, որ երեկ Կառավարության շենքի դիմաց Երևանի թիվ 2 պետական քոլեջի դասախոսներն ու ուսանողներն ԿԳ նախարար Արայիկ Հարությունյանից պահանջում էին վերանայել մարտի 13-ի որոշումը, ըստ որի՝ Նորայր Աճեմյանի անվան տարածաշրջանային թիվ 2 պետական քոլեջի տնօրեն Կառլեն Հայրապետյանը հեռացվել էր աշխատանքից:
Նելլի Մելքոնյան
