Ռուբեն Հայրապետյանը չարձագանքեց իր անվան հետ կապվող միջադեպի մասին հարցին. հարուցվել է քրգործ

ՀՀ քննչական կոմիտեի Աբովյանի քննչական բաժնում ձեռնարկվում են անհրաժեշտ քննչական գործողություններ՝ պարզելու Երևանի 24-ամյա բնակչին առևանգելու և ծեծի ենթարկելու հանգամանքները: Այս մասին հայտնում է ՀՀ քննչական կոմիտեն:

Քննչական կոմիտեի փոխանցմամբ՝ 2017 թվականի օգոստոսի 15-ին Երևանի բնակիչ, 1993թ. ծնված երիտասարդից ոստիկանությունում հաղորդում է ստացվել առ այն, որ նույն թվականի օգոստոսի 14-ին՝ ժամը 15:30-ի սահմաններում, Սևան-Երևան ավտոճանապարհին՝ «Բեկոն» մսամթերքի արտադրամասի մոտակայքում, վնասել են իր ավտոմեքենան, բռնություն գործադրել իր նկատմամբ։ Ըստ քաղաքացու՝ բռնության գործադրմամբ իրեն տեղափոխել են Երևան քաղաքում գործող սրճարաններից մեկում գտնվող գրասենյակ, որտեղ կրկին ծեծի են ենթարկել,ապա որոշ ժամանակ անց բաց թողել։

Նշենք, որ մամուլում լուրեր են շրջանառվում՝ 24-ամյա երիտասարդի դաժան ծեծը կապվում է Հայաստանի ֆուտբոլի ֆեդերացիայի նախագահ Ռուբեն Հայրապետյանի անվան հետ: Համաձայն շրջանառվող տեղեկությունների՝ երիտասարդը մի խումբ անձանց կողմից դաժան ծեծի է ենթարկվել այն բանի համար, որ հանդգնել է Ռուբեն Հայրապետյանի հորաքրոջ թոռնուհուն հրավիրել իր ծննդյան արարողությանը։

Թեմայի շուրջ Factor.am-ը փորձեց պարզաբանում ստանալ Հայաստանի ֆուտբոլի ֆեդերացիայի նախագահ Ռուբեն Հայրապետյանից: «Դուք ի՞նչ գիտեք՝ ես հիմա որտե՞ղ եմ, ի՞նչ պայմաններում եմ, կարո՞ղ եմ զրուցել, թե՞ ոչ»,- մեր հարցին պատասխանելու փոխարեն արձագանքեց Հայրապետյանն, ապա անջատեց հեռախոսը:

Հավելենք, որ միջադեպի առնչությամբ  ՀՀ ՔԿ Աբովյանի քննչական բաժնում հարուցվել է քրեական գործ՝ ՀՀ քրեական օրենսգրքի 131-րդ հոդվածի 2-րդ մասի 1-ին, 2-րդ և 3-րդ կետերով և 185-րդ հոդվածի 3-րդ մասի 1-ին կետով: Կազմվել է քննչական խումբ: Երիտասարդը ճանաչվել է տուժող։

Շողիկ Գալստյան