Երբ կառավարության ծրագրում մենք ասում էինք՝ թվեր չկան, դուք ասում էիք՝ նորմալ է․ Գորգիսյանը՝ «Իմ քայլ»-ական պատգամավորներին

Ազգային ժողովն այսօր նիստի օրակարգում չընդգրկեց «Լուսավոր Հայաստան» խմբակցության ներկայացրած ՔՕ-ում փոփոխություն կատարելու մասին օրենքի նախագիծը։ Քաղաքական մեծամասնության պատգամավոր Սուրեն Գրիգորյանը, անդրադառնալով  ԼՀԿ-ական պատգամավորների ներկայացրած օրենսդրական նախաձեռնությանը ԱԺ գլխադասային հանձնաժողովի կողմից տրված բացասական եզրակացությանը, նշեց, որ նման եզրակացություն է ստացել այդ նախագիծը, քանի որ դրանում թվեր չեն եղել և չի հիմնավորվել՝ քանի ձերբակալվածի վրա առաջարկը կարող է տարածվել։

«Դե որ էդպես է, եկեք նախագիծ բերենք ու անազատության մեջ եղածներին բոլորին բաց թողնենք»,- ասաց  պատգամավորը։

Անդրադառնալով  «Իմ քայլ»-ական պատգամավորի ելույթին, ընդդիմադիր պատգամավոր Գևորգ Գորգիսյանը նկատեց․«Երբ կառավարության ծրագրում մենք ասում էինք՝ թվեր չկան, դուք ասում էիք, որ դա նորմալ է: Մենք այժմ ասում ենք քննարկել նախագիծը։ Մենք կասկածի տակ չենք դնում ձեր քաղաքական անկախությունը և անսալով այդ անկախությանը՝ առաջարկում ենք օրակարգում քննարկել այն հարցերը, որոնք հանձնաժողովում ստացել են բացասական եզրակացություն»:

Գորգիսյանը նշեց, որ այս նախագծի քննարկումը հնարավորություն կտար առաջինից երկրորդ ընթերցման ընթացքում նախագծում կատարել փոփոխություն և արված առաջարկությունները ներառել դրանում։

«Ասում ենք եկեք քննարկենք ձեր բոլոր մոտեցումները և առաջինից երկրորդ ընթերցման ընթացքում մտցնենք այդ առաջարկները, ոչ թե այսպես հետաձգենք հարցի քննարկումը»,- դիտարկում արեց ԼՀԿ-ական պատգամավորը։

Աղավնի Սուքիասյան