28.09.2026 | 12:10
Թաթան կոպիտ սխալ է որակել սեպտեմբերի 27-ին համերգ ցուցադրելը // Պապիկյանն անակնկալ զորամաս է այցելել․ ԼՈՒՐԵՐ
Թրամփը պարզաբանել է Հարավային Կորեայի հետ զորավարժությունների դադարեցումը
Քաղաքականություն
04.03.2019 | 17:43
Դոնալդ Թրամփը խոսել է Հարավային Կորեայի հետ զորավարժությունների դադարեցման պատճառների մասին․ հայտնում է rbc.ru-ն։
«Պատճառը, որի համար չեմ ցանկանում Հարավային Կորեայի հետ համատեղ զորավարժություններ անցկացնել, ԱՄՆ-ի համար հարյուրավոր միլիոն դոլարների խնայողությունն է, որոնք մեզ չեն փոխհատուցվելու։ Ես այս դիրքորոշումը վաղուց եմ ունեցել՝ դեռ մինչև նախագահ ընտրվելը։ Բացի այդ, այս շրջանում Հյուսիսային Կորեայի հետ հարաբերություններում լարվածության թուլացումը լավ է»,- թվիթերի իր միկրոբլոգում գրել է Թրամփը։
Հարավային Կորեայի և ԱՄՆ-ի կողմից իրականացվող Key Resolve և Foal Eagle ամենամյա զորավարժությունների դադարեցման մասին նախորդ շաբաթ հայտարարել էին երկու երկրների Պաշտպանության նախարարությունները։
Գերատեսչությունների ղեկավարները նախօրեին պարզաբանել էին ավանդական զորավարժությունների դադարեցումը և ընդգծել, որ այս որոշումը ցույց է տալիս Վաշինգտոնի և Սեուլի ձգտումը՝ աջակցել Կորեական թերակղզու ապամիջուկայնացման դիվանագիտական ջանքերին։
Դադարեցված Key Resolve և Foal Eagle-ի փոխարեն կանցկացվեն նոր զորավարժություններ՝ Dong Maeng անվամբ։ Դրանք կանցկացվեն մարտի 4-12-ը և կենտրոնացած կլինեն Կորեական թերակղզու ընդհանուր ռազմական գործողությունների մարտավարական ասպեկտների վրա։
Հիշեցնենք, որ Հարավային Կորեայի հետ համատեղ զորավարժությունները դադարեցնելու մասին որոշումը հետևել էր ԱՄՆ նախագահի և Հյուսիսային Կորեայի նախագահ Կիմ Չեն Ընի հանդիպմանը։ Նրանց հանդիպումն ավարտվել էր առանց որևէ համաձայնություն ստորագրելու։ Կողմերը միայն պայմանավորվածություն էին ձեռք բերել՝ շարունակել բանակցությունները։ Բացի այդ, ավելի վաղ՝ Փհենյանը մի քանի անգամ դժգոհություն էր հայտնել ԱՄՆ-ի և Հարավային Կորեայի համատեղ զորավարժությունների վերաբերյալ։
Նելլի Մելքոնյան
