10.06.2026 | 20:13
Վալերի Ծառուկյանը հեռացել է «Ախմատից»
Արցախի խորհրդարանում ընդունել են ՀՀ ԱԺ նախագահ Արարատ Միրզոյանին
09.02.2019 | 19:11
Արցախի Հանրապետության ԱԺ-ից տեղեկացնում են, որ փետրվարի 9-ին Ազգային ժողովի նախագահ Աշոտ Ղուլյանն ընդունել է աշխատանքային այցով Արցախ ժամանած Հայաստանի Հանրապետության Ազգային ժողովի նախագահ Արարատ Միրզոյանին:
Ողջունելով ՀՀ խորհրդարանի նախագահին՝ Աշոտ Ղուլյանը մեկ անգամ ևս շնորհավորել է ԱԺ նախագահին բարձր և պատասխանատու պաշտոնը ստանձնելու կապակցությամբ և մաղթել արդյունավետ աշխատանք: ԱՀ խորհրդարանի ղեկավարը հույս է հայտնել, որ ՀՀ օրենսդիր մարմնի նոր կազմի հետ ծանոթությունների ճանապարհով կընդլայնվի նախորդ տարիներին ձևավորված համագործակցությունը:
Արարատ Միրզոյանը, շնորհակալություն հայտնելով հրավերի համար, կարևորել է երկկողմ հարաբերություններում առկա ավանդույթը, որի համաձայն ՀՀ ԱԺ նախագահները աշխատանքային առաջին այցը կատարում են Արցախ, և համոզմունք հայտնել, որ համատեղ ջանքերի ներդրմամբ երկու հայկական խորհրդարանների միջև հարաբերություններն ավելի կսերտանան:
Այնուհետև տեղի է ունեցել ընդլայնված կազմով հանդիպում՝ ՀՀ և ԱՀ խորհրդարանների նախագահների և ԱՀ ԱԺ պատգամավորների մասնակցությամբ:
Հայաստանի օրենսդիր մարմնի նախագահը կարևորել է համազգային խնդիրների շուրջ անկեղծ քննարկումների ձևաչափը և համատեղ եզրակացություններ անելու ու միասնական որոշումներ ընդունելու հանգամանքը:
Հանդիպման ընթացքում քննարկվել են բանակցային գործընթացի ներկա փուլին, Հայաստանի արտաքին քաղաքական առաջնահերթություններին, ՀՀ կառավարության ծրագրով կրթության և ՏՏ ոլորտներում իրականացվելիք աշխատանքներին, Արցախի և Հայաստանի միջև ռազմաքաղաքական համաձայնագրին վերաբերող հարցեր և հնչել առաջարկություններ:
Ամփոփելով հանդիպումը՝ ԱՀ ԱԺ նախագահ Աշոտ Ղուլյանը նշել է, որ երկուստեք պայմանավորվածություն է ձեռք բերվել քննարկել միջխորհրդարանական հանձնաժողովի առաջիկա նիստի կազմակերպման հնարավորությունները և նիստի օրակարգում ներառվելիք հարցերի շրջանակը:
Հաջորդիվ կայացել է ՀՀ ԱԺ նախագահի ճեպազրույցը:
Առավոտյան Արարատ Միրզոյանը տիկնոջ հետ այցելել է Ստեփանակերտի եղբայրական հուշահամալիր, հարգանքի տուրք մատուցել արցախյան պատերազմում զոհված նահատակների հիշատակին, այնուհետև Քրիստափոր Իվանյանի անվան ռազմական վարժարանում ծանոթացել ռազմաուսումնական հաստատության առօրյային և կրթական ծրագրերին: Օրվա երկրորդ կեսին Հայաստանի Հանրապետության ԱԺ նախագահը Արցախի Հանրապետության խորհրդարանի ղեկավարի ուղեկցությամբ այցելել է Շուշի Սուրբ Ամենափրկիչ Ղազանչեցոց եկեղեցի և շրջել Կերպարվեստի և Երկրաբանական թանգարաններում:
