ԵՐԵՎԱՆԻ ԺԱՄԱՆԱԿՈՎ․ «Ես դուրս եմ այսօր տիրող հարմոնիայից». Էմմա Պետրոսյան

 «70-80-ականներին, երբ դեռ երեխա էի, շատ իրական գույներ, երգեր կային Երևանում։ Աչքերս բացել եմ և տեսել եմ տպարանը՝ Ալավերդյան փողոցում։ Մի օր անցա ու տեսա, որ այն հավասարվել է հողին, ուզում եմ հարցնել՝ ինչո՞ւ, ո՞ւմ էր խանգարում տպարանը»,- ափսոսանք է հայտնում երգչուհի, երգահան Էմմա Պետրոսյանը՝ Factor.am-ի «Երևանի ժամանակով» զրուցաշարի շրջանակում։

Անդրադառնալով հայաստանյան ներքին կյանքին՝ երգչուհին շեշտում է․ «Երազում եմ, որ սոցիալական խնդիրները Հայաստանում պակասեն, ես այլևս չեմ կարողանում «արտագաղթ» բառը լսել, սա ինձ հունից հանում է, սա մեր վաղն է։ Ես չեմ դիմանում, սա ինձ համար ցավ է, լուրջ ցավ։ Կուզենայի, որ մենք այսօր մեր երկիրը կարողանայինք ապահովել աշխատատեղերով, բոլորին վարակել աշխատելով, չքնել, զգոն լինել․ սա է պատերազմում մեր հաղթանակը։ Մենք չենք կարող հաղթել, եթե քնած ենք, եթե բացակա ենք»։

Խոսելով այսօր գերիշխող երաժշտության մասին, Է․ Պետրոսյանը խոստովանում է․ «Ես դուրս եմ այսօր տիրող հարմոնիայից և շատ ուրախ եմ դրա համար, իմ հասցեն կոնսերվատորիայի հասցեն է, այնտեղ է իմ երաժշտական մտածողության հասցեն»։

Նա նշում է, որ արվեստագետներով տարիներ շարունակ փորձել են պայքարել տիրող հարմոնիայի՝ անճաշակ երաժշտության դեմ, սակայն ապարդյուն․ «Հոգնեցի․․․Մենք պետք է ամեն ինչ անենք, որ նրանք, ովքեր նոր են ծնվում, չլսեն այն, ինչ այսօր ֆալշ է համարվում։ Բոլորս պետք է գնանք ճիշտ ռիթմի ետևից»։

Իսկ հարցին, թե վերջերս վաստակավոր արտիստի կոչմանն արժանացնելու հանգամանքն արդյոք իշխանությունների կողմից արվեստագետի հնարավոր ընդվզումը կանխելու փորձ չէր, մեր զրուցակիցը պատասխանեց․ «Ապրում եմ այնպես, ինչպես ապրում էի, ոչինչ չփոխվեց, ես հարստացա պարտական լինելով, այն մտորումով, թե վաղը ինչ պետք է վերադարձնեմ պետությանը»։

Մանրամասները՝ Factor.am-ի տեսանյութում։

Աննա Բաբաջանյան