Ինչո՞ւ մայթերը զավթած սրճարանների հարցում Տարոն Մարգարյանի խոստացած խաղի հավասար կանոնները չեն գործում

Մոտ մեկ ամիս առաջ Երևանի քաղաքապետարանն ապամոնտաժեց Թումանյան փողոցում գտնվող սննդի և սպասարկման մի քանի կետ: Ըստ քաղաքապետարանի՝ աապամոնտաժված առևտրային կազմակերպությունները, իրենց գործունեությունը ծավալել էին մայթի բանուկ հատվածում՝ կեսից ավելի մասում տեղակայելով սեղաններ և աթոռներ՝ այդպիսով խոչընդոտելով քաղաքացիների ազատ տեղաշարժը:

Ապամոնտաժման գործընթացին նախորդել էր քաղաքապետ Տարոն Մարգարյանի անդրադարձը մայրաքաղաքում բացօթյա սեզոնային սրճարանների գործունեության կազմակերպմանը: Մարգարյանն ընդգծել էր, որ դրանք չպետք է խոչընդոտեն հետիոտնի տեղաշարժին: Այսօր, սակայն, Երևանի բազմաթիվ փողոցների մայթերը շարունակում են զավթված մնալ սրճարանների կողմից, դրանց վրա Տարոն Մարգարյանի նշած հստակ կանոնները առայժմ չեն տարածվում: Թե երբ, ի վերջո, այդ կանոնները կսկսեն գործել բոլորի համար, և որ սրճարանատերերն առաջիկայում ստիպված կլինեն ազատել քաղաքային մայթերը՝ փորձեցինք պարզել Երևանի քաղաքապետարանից՝ ուղարկած գրավոր հարցմամբ խնդրելով տրամադրել այն սրճարանների ցանկը, որոնց մայթերի հատվածները նույն հիմնավորմամբ առաջիկայում կապամոնտաժվեն:

Քաղաքապետարանից, սակայն, ցանկը տրամադրելու փոխարեն հղում են արել Երևան քաղաքի ավագանու N648-Ն որոշմամբ հաստատված հավելվածի 40-րդ կետին և ընդգծել, որ հարցը կարգավորվում է այդ իրավական ակտի պահանջներով և ներկայումս ձեռնարկվում են համապատասխան քայլեր՝ տնտեսվարող սուբյեկտների կողմից իրականացվող բացօթյա սրճարանային գործունեության կազմակերպումը նշված իրավական ակտի պահանջներին համապատասխանեցնելու ուղղությամբ: Քաղաքապետարանից վսհատեցնում են՝ գործընթացը կրում է շարունակական բնույթ և գտնվում է աշխատակազմի համապատասխան ստորաբաժանումների հսկողության ներքո:

Քաղաքապետարանի մեջբերած իրավական ակտից տեղեկանում ենք, որ բացօթյա սրճարանների ծառայությունների կազմակերպման համաձայնությունը տալիս է Երևանի քաղաքապետը՝ սահմանելով տարածքի օգտագործման կարգը, պայմաններն ու սահմանափակումները: Ստացվում է, որ ոլորտի կարգավորման հարցը գտնվում է բացառապես Տարոն Մարգարյանի հայեցողության ներքո: Խաղի հստակ կանոնների մասին բարձրաձայնող քաղաքապետը, մինչդեռ, չի շտապում այդ կանոնների կիրառման հարցում սկզբունքային լինել: Մնում է հուսալ, որ մինչ սեզոնային սրճարանների փակումը Տարոն Մարգյանը ոլորտում խաղի հավասար կանոններ կսահմանի՝ այդպիսով հերքելով այն պնդումները, որ սրճարանների ապամոնտաժումն իրականում կատարվել է ընտրողաբար:

Շողիկ Գալստյան