Սամվել Բաբայանը իր՝ քաղբանտարկյալ լինելու մասին հարցը թողեց անպատասխան

Կենտրոն և Նորք-Մարաշ վարչական շրջանների ընդհանուր իրավասության դատարանում այսօր մեկնարկեց Լեռնային Ղարաբաղի Պաշտպանության բանակի նախկին հրամանատար Սամվել Բաբայանի և ևս վեց անձի վերաբերյալ քրեական գործով առաջին դատական նիստը:

Սամվել Բաբայանը հիշեցնենք՝ մեղադրվում է  փողերի լվացման, ինչպես նաև «Իգլա» տեսակի դյուրակիր զենիթահրթիռային համալիր ձեռք բերելու, փոխադրելու և պահելու փորձի մեջ:

Գործով անցնող 7 մեղադրյալներից Սամվել Բաբայանը, Սանասար Գաբրիելյանը և Արմեն Պողոսյանը կալանավորված են, իսկ մյուս չորսի՝ Կարեն Քոչարյանի, Անդրանիկ Քոչարյանի, Ժորա Զաքարյանի և Դավիթ Հարությունյանի նկատմամբ կիրառվել է ստորագրությունը՝ չհեռանալու մասին: 

Նիստի մեկնարկին նախագահող դատավոր Արշակ Վարդանյանի՝ ամբաստանյալների ինքնությանը վերաբերող   հարցերին  Սամվել Բաբայանը  ժպիտով էր պատասխանում:

Նախկինում դատապարտված  Արցախի հերոսը  չհամաձայնեց դատավորի հնչեցրած մտքի հետ, որ ներմամբ է ազատ արձակվել:

«Ընդհանրապես ես ներմամբ չեմ ազատվել: Կարող եք ոնց ուզում եք ձևակերպել: Նայած ով ինչ է ձևակերպում: Եթե իմ խոսքն եք ուզում լսում, ընդհանրապես հիվանդության պատճառով եմ դուրս եկել, բայց, թե ինչ են ձևակերպել դա իրենց խնդիրն է: Էսօր որ էստեղ նստած եմ, դա ևս իրենց գործն է»,- արձագանքեց Բաբայանը:

Այսօրվա նիստը հետաձգվեց մեղադրյալներից Արմեն Պողոսյանի պաշտպան Վիկտորիա Գևորգյանի բացակայության պատճառով, հաջորդ դատական նիստը նշանակվեց օգոստոսի 28-ին, ինչը հարուցեց Սամվել Բաբայանի դժգոհությունը:

Factor.am-ը նիստի ավարտին Սամվել Բաբայանին հարց ուղղեց՝ իրեն քաղբանտարկյալ համարո՞ւմ է, Արցախի հերոսը, սակայն, հարցն անպատասխան թողեց:

Շողիկ Գալստյան