«Շանտաժ է իրականացվում՝ ասելով, որ անպայման պատերազմ է լինելու». Արման Մելիքյան

Արցախի նախկին արրտգործնախարար Արման Մելիքյանը Factor.am-ի հետ զրույցում, անդրադառնալով Արցախի կառավարության վերջին աղմկահարույց  ծախսերին, մասնավորապես՝ 350 հազար ԱՄՆ դոլարի նոր մեքենաների գնմանը, տեսակետ հայտնեց, որ «դրսի պատվիրակություններին պետք է սպասարկել բարձրակարգ մեքենաներով, բայց ամենևին պարտադիր չէ, որ այդ նույն բարձրակարգ մեքենաները սպասարկեն Հայաստանի կամ Արցախի կառավարության անդամներին»:

«Պետական պաշտոնյաները պետք է համեստ լինեն»,- ասաց Արցախի կառավարության նախկին անդամը՝ հավելելով. «Ես չեմ ասում, մեր պաշտոնյաները պետք է ցնցոտիներով ման գան»:

Իսկ այն, որ, օրինակ, Հայաստանի պետական պաշտոնյաների թանկարժեք ծառայողական մեքենաները հաճախ օգտագործվում են նաև նրանց ընտանիքի անդամների կողմից, Արցախի ԱԳ նախկին նախարարը լկտիություն է որակում. «Դա լկտիություն է, և այդ լկտիությանը պետք է վերջ տալ»:

Ըստ Արման Մելիքյանի՝ Սարգսյան-Ալիև առաջիկա հնարավոր հանդիպումից ակնկալիք չկա, կողմերի դիրքորոշումները չեն փոխվել և քանի «տարածքներ՝ կարգավիճակի դիմաց» բանաձևն է սեղանին, հայկական կողմի դիրքեը թուլանալու են:

«Հայաստանը պետք է փոխի իր մոտեցումները»,- նշեց Մելիքյանը՝ հավելելով, որ վտանգավոր է համարում բանակցային սեղանի շուրջ վերջին զարգացումները:

«Շանտաժ է այժմ իրականացվում` ասելով, որ անպայման պատերազմ է լինելու, եթե տեղաշարժ չլինի բանակցային սեղանի շուրջ»,- համոզված է Արցախի նախկին արտգործնախարարը:

Մանրամասները դիտեք Factor.am-ի հետ Արցախի նախկին արտգործնախարար Արման Մելիքյանի հարցազրույցում:

Մարինե Խառատյան