16.07.2026 | 10:14
Արման Ծառուկյանը չի բացառել մասնակցությունն Օլիմպիական խաղերին
Էջմիածնում շարունակվում է քաղաքացիների բողոքի ակցիան՝ ընդդեմ Մանվել Գրիգորյանի ազատ արձակման
Քաղաքականություն
23.12.2018 | 11:41
Էջմիածնում այսօր ևս շարունակվում է քաղաքացիների բողոքի ակցիան՝ ընդդեմ գեներալ-լեյտենանտ Մանվել Գրիգորյանի ազատ արձակման:
Հիշեցնենք, որ ակցիան մեկնարկել էր դեկտեմբերի 21-ին։ Ակցիայի մասնակիցները փակել էին ինչպես Էջմիածին քաղաքի փողոցները, այնպես էլ Երևան-Արմավիր մայրուղին: Նրանք պահանջում են, որ Մանվել Գրիգորյանը նորից կալանավորվի:
Նշենք, որ Մանվել Գրիգորյանն ազատ էր արձակվել 25 մլն դրամ գրավի դիմաց:
Նախօրեին լրագրողների հետ զրույցում ՀՀ վարչապետի պաշտոնակատար Նիկոլ Փաշինյանն ասել էր, որ չգիտի, թե դատարանն ինչ հիմնավորումներով է Մանվել Գրիգորյանին ազատ արձակելու որոշում կայացրել. «Ես հասկանում եմ մարդկանց դժգոհությունը: Անկեղծ ասած՝ ես չգիտեմ, թե դատարանը ինչ հիմնավորումներով է այդ որոշումը կայացրել, երբ հասանելի կլինի այդ որոշումը, կծանոթանամ, բայց կարծիք էլի չեմ հայտնի»:
Իսկ ՀՀ գլխավոր դատախազությունը հայտարարություն էր տարածել, ըստ որի՝ վերաքննիչ բողոք կներկայացնի Ազգային Ժողովի պատգամավոր, ԵԿՄ նախկին նախագահ Մանվել Գրիգորյանին գրավի դիմաց կալանքից ազատ արձակելու վերաբերյալ Առաջին ատյանի դատարանի որոշման դեմ։«Գլխավոր դատախազությունը ստացել է դատարանի որոշումը, այն հիմնավոր չէ, և Դատախազությունը վերաքննիչ բողոք է ներկայացնելու դատարանի որոշման դեմ»,- ասել էր ՀՀ գլխավոր դատախազության հանրային կապերի բաժնի պետ Արևիկ Խաչատրյանը։
ՀՀ ոստիկանապետ Վալերի Օսիպյանն էլ հայտարարել էր, որ Մանվել Գրիգորյանը Ակնալիճի իր առանձնատանն է, այնտեղ ոստիկանները շուրջօրյա ծառայություն են իրականացնում:
