Խորհրդարան անցած ուժերը՝  «Ծառուկյան» դաշինքի ինքնաբացարկների մասին

«Ծառուկյան» դաշինքի ցուցակում ընդգրկված 12 պատգամավոր գրությամբ դիմել է ԿԸՀ՝ հայտարարելով, որ ինքնաբացարկի դիմում չի ներկայացրել։ Այս առնչությամբ Factor.am-ը զրուցել է խորհրդարան անցած մյուս ուժերի ներկայացուցիչների հետ։

Ընդդիմադիր «Ելք» դաշինքի առաջնորդ Էդմոն Մարուքյանն այն կարծիքին է, որ ինքնաբացարկի դիմում չներկայացրած անձինք պետք է իրավական ընթացակարգով խնդիրը լուծեն։

Հարցին, թե ինչի՞ մասին է խոսում այն երևույթը, որ պատգամավորի թեկնածուն տեղյակ չէ իր ինքնաբացարկի դիմումի մասին, Մարուքյանն ասաց. «Դա Հայաստանի քաղաքական համակարգի խնդիրներից մեկն է․ ընտրողները ում ընտրել են, էդ մարդիկ պետք է լինեն խորհրդարանում, ոչ թե ընտրողները մի ուրիշին ընտրեն, մյուսը դառնա պատգամավոր։ Ես միայն մեր մասով կարող եմ պատասխան տալ՝ «Ելք» դաշինքում նման բան չկա, չի կարող լինել»։

Խորհրդարանական մեծամասնության՝ իշխող ՀՀԿ-ի խոսնակ Էդուարդ Շարմազանովը չցանկացավ մեկնաբանել իրավիճակը` դա որակելով որպես ներկուսակցական կոնֆլիկտ. «Ես կոռեկտ չեմ համարում այլ քաղաքական ուժերի ներքին խնդիրները մեկնաբանել, դաբացառապես «Ծառուկյան» դաշինքի ղեկավարի և անդամների մեկնաբանելու հարց է: Ես կոռեկտ չեմ համարում նման բան մեկնաբանելը, հատկապես երբ այն վերաբերում է ընտրություններում երկրորդ տեղը զբաղեցրած քաղաքական ուժին»:

Դիտարկմանը, թե տվյալ դեպքում առաջնայինն ինքնին երևույթն է, որի արմատավորման հիմնական պատասխանատուն հենց իշխող ՀՀԿ-ն է, Շարմազանովն արձագանքեց, թե  իրենց օրինակով ցույց են տվել, որ ինքնաբացարկները պետք է լինեն գործընկերների հետ համաձայնեցված։

Խորհրդարան անցած մյուս ուժի՝ ՀՅԴ-ի ներկայացուցիչ Աղվան Վարդանյանը  ձեռնպահ մնաց  մեկնաբանություն տալուց:

Սեդա Ղուկասյան