Քաղաքականություն
14.12.2018 | 16:20
Երբ ես ստանձնեցի «Հայաստան» համահայկական հիմնադրամի ղեկավարի պաշտոնը, հիմնադրամի նկատմամբ կար վստահության շատ մեծ խնդիր թե՛ Հայաստանում, թե՛ հատկապես դրսում։ Հոկտեմբեր ամսին ճանապարհորդել եմ, հանդիպումներ եմ ունեցել բազմաթիվ դոնորների հետ, և փորձել ենք ամեն ինչ անել, որ այդ վստահությունը վերականգնվի, ինչի ապացույցը դրամահավաքի ժամանակ հավաքված գումարն է, որն ավելացել է։
Այս մասին այսօր հրավիրված մամուլի ասուլիսի ժամանակ ասաց «Հայաստան» համահայկական հիմնադրամի տնօրեն Հայկակ Արշամյանը՝ ներկայացնելով տվյալներ՝ հավաքված գումարի չափից։
«Եթե հիշում եք՝ խոսքը գնում էր 11 միլիոն 109 հազար 631 ԱՄՆ դոլարի մասին, այսինքն՝ դա իր մեջ ներառում էր թե՛ Միացյալ Նահանգներում հավաքագրված գումարը, թե՛ Տորոնտոյում, թե՛ ընդհանրապես այդ օրը դրամահավաքի մասին է խոսքը, և ասեմ, որ այսօրվա տվյալներով, թարմ տվյալներով՝ մենք առնվազն ունենք 14 միլիոն 115 հազար 940 դոլար, այսինքն հեռուստամարաթոնից հետո այս գումարը բավականին աճել է և ի տարբերություն նախորդ տարվա, երբ 12 միլիոն դոլարի խոստում է եղել, իրականում հիմնադրամ մուտք է եղել 7 միլիոն դոլար»,- ասաց Հայկակ Արշամյանը:
Ըստ Արշամյանի՝ այս գումարի մեջ չի մտնում Արգենտինայում հավաքագրված գումարը, որովհետև էնտեղի համահայկական հիմնադրամի գրասենյակը ՅՈւՆԻՍԵՖ-ի հետ համատեղ դրամահավաք է իրականացրել երկու օր առաջ։
«Այդ դրամահավաքի արդյունքում մոտավորապես 245 հազար դոլար է հավաքվել, սակայն էդ գումարի որ չափն է հիմնադրամի խողովակներով գալու՝ դրա մասին այնտեղ բանակցություններ են գնում, բայց մեկ է՝ էդ գումարը հավաքագրված ընդհանուր գնալու է Գյումրի և Սպիտակ, քանի որ երկրաշարժի 30-րդ տարելիցին էր նվիրված, և հիմնականում էդ երկու շրջաններում են իրականացվելու ծրագրեր», – ասաց նա։
Աղավնի Սուքիասյան
