09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Չքաղաքականացնել թեման. ՌԴ դեսպանատունը որոշել է հայկական ԶԼՄ-ներին դասեր տալ
Քաղաքականություն
14.12.2018 | 11:59
Հայաստանում Ռուսաստանի դեսպանատունը, անգամ Գյումրիում 57-ամյա կնոջ սպանությանը ռուս զինծառայողի հնարավոր առնչության մասին լուրից հետո, ռուս զինծառայողների կարգապահության խնդիրը սեփական իշխանությունների մոտ բարձրացնելու փոխարեն, որոշել է հայկական լրատվամիջոցներին դասեր տալ:
Ռուսական դիվանագիտական ներկայացուցչության մամուլի ծառայությունը հաղորդագրություն է տարածել՝ կոչ անելով չքաղաքականացնել թեման:
«Ուշադրություն ենք դարձրել Գյումրիում տեղի ունեցած ողբերգական միջադեպի վերաբերյալ հուզիչ մեկնաբանությունների չդադարող հոսքին: Կրկին կոչ ենք անում՝ չքաղաքանացնել այս թեման, չանել հապճեպ եզրակացություններ և չխանգարել հայկական քննչական մարմիններին՝ կատարել իրենց գործը: Ցանկանում ենք նաև ցավակցություն հայտնել տուժածի հարազատներին և մտերիմներին»,- ասված է հաղորդագրությունում:
Մինչ այդ էլ դեսպանատունը սպանությանը ռուս զինծառայողի հնարավոր մասնակցության մասին լուրերի հրապարակումը կոչել էր «վերին աստիճանի ոչ մասնագիտական մոտեցում»՝ դա որակելով « Հայաստանի և Ռուսաստանի միջև առկա ռազմավարական և ավանդական բարեկամական հարաբերություններում սեպ խրելու» ցանկություն:
Նշենք, որ Գյումրիի 57-ամյա բնակչուհու սպանության մեջ կասկածվող ռուս զինծառայողը կալանավորվել է: Արդեն հայտնի է նաև, որ գործը քննելու է դատավոր Վահե Միսակյանը:
Միաժամանակ, ըստ տեղեկությունների, զինծառայողին հայ իրավապահներին չեն հանձնել. նա պահվում է Գյումրու 102-րդ ռազմաբազայում:
