20.10.2026 | 11:20
Կանանց պահանջներն ու առաջարկները՝ կենսաբազմազանության պահպանման օրակարգում․ ՈՒՂԻՂ
ԱՄՆ Սենատի հանձնաժողովը Լին Թրեյսիին հաստատել է Հայաստանում ԱՄՆ դեսպանի պաշտոնում
Քաղաքականություն
14.12.2018 | 10:53
ԱՄՆ Սենատի արտաքին հարաբերությունների հանձնաժողովը Լին Թրեյսիին հաստատել է Հայաստանում ամերիկյան դեսպանի պաշտոնում: Ադրբեջանում ամերիկյան դիվանագիտական ներկայացուցչության ղեկավարի պաշտոնում էլ հաստատվել է Էրլ Լիցենբերգերի թեկնածությունը:
«Ամերիկայի ձայն»-ի հաղորդմամբ՝ անցյալ շաբաթ տեղի ունեցած լսումների ընթացքում դեսպանը, պատասխանելով սենատորներ Էդ Մարքիի եւ Բոբ Մենենդեզի հարցերին, ընդգծել էր, որ անհրաժեշտ է համարում Հայաստանի հետ ընդլայնել հարաբերությունները բոլոր մակարդակներով:
«Հայաստանում մեր քաղաքականության նպատակը մնում է անփոփոխ՝ անկախ, ժողովրդավար և բարգավաճող Հայաստանի ամրապնդումը, որը խաղաղության մեջ է ապրում իր հարևանների հետ: Եվ մենք կրկին հաստատում ենք մեր նվիրվածությունը ինքնիշխան Հայաստանին, որն ազատ է ընտրելու սեփական գործընկերներին»,- ասել է դեսպանի թեկնածուն:
Թրեյսիի խոսքով՝ ԱՄՆ-ն պետք է Հայաստանին տրամադրվող աջակցությունը կենտրոնացնի երեք ուղղություններով. կոռուպցիայի դեմ պայքար, քաղաքացիական հասարակության ամրապնդում և անկախ լրատվամիջոցների աջակցություն:
Հայոց ցեղասպանության ճանաչման վերաբերյալ հարցին ի պատասխան էլ՝ Լին Թրեյսին նշել էր, որ Հայաստանում ԱՄՆ դեսպանի իր լիազորությունների սահմաններում անելու է ամեն ինչ՝ «ճանաչելու և հարգելու կորուստներն ու տառապանքները», և մասնակցելու է զոհերի հիշատակի միջոցառումներին. «1915 թվականի սարսափելի իրադարձությունները 20-րդ դարի վատագույն դաժանություններից էին, երբ Օսմանյան կայսրության վերջին տարիներին մեկ եւ կես միլիոն հայ արտաքսվել, սպանվել կամ մահվան էր ուղարկվել: Ինչպես այս տարի Հայերի հիշատակի օրն ընդգծել էր նախագահ Թրամփը, նման դաժանությունները չպետք է կրկնվեն»:
